Ish-zv.ministri i Punëve të Jashtme, Anton Berisha deklaron se tashmë heqja e masave ndaj Kosovës nga Bashkimi Evropian lidhet edhe me respektimin e marrëveshjes së Brukselit respektivisht Asociacionin e komunave me shumicë serbe.
“Kjo sigurisht se do të lidhet jo vetëm me largimin e kryetarëve të komunave dhe me deeskalimin e situatës në veri, por edhe me vet respektimin e marrëveshjes, respektivisht krijimin e Asociacionit dhe të gjitha detyrimet që ka marrë Kurti që ka menduar ose mendon që ato t’i pranojë kështu formalisht, por jo t’i ekzekutojë”, ka thënë Berisha.
Sipas tij, marrëveshja e Brukselit dhe ajo e Ohrit tashmë është futur në korniza të asaj si kusht për integrim në Bashkimin Evropian.
“Pra për procesin integrues dhe kjo nënkupton që patjetër pala kosovare nuk mund të bëj asnjë hap pa respektimin e atyre konditave dhe unë nuk pres që ato të hiqen, ose ato do të hiqen në varësi të asaj se sa Kosova plotëson ose kryen detyrimet që i ka marrë në marrëveshjen e Ohrit dhe të Brukselit”,ka shtuar ai.
I pyetur se a i është bërë e padrejtë Kosovës nga vendosja e këtyre masave, Berisha ka thënë se kjo retorikë që është duke i diskutuar në Kosovë është jashtëzakonisht e pasaktë.
Siç, thotë Berisha njëjtë edhe Serbia e vuan moszbatimin dhe moskonstruktivitetin me bashkësinë ndërkombëtare nga viti 99 që është bombarduar e deri sot që ende nuk është anëtare e Bashkimit Evropian, shkruan Front Online.
Muajin e kaluar, më shumë se 10 vende evropiane i kërkuan Josep Borrellit të heqë kufizimet politike dhe ekonomike kundër Kosovës, duke vënë në dukje gjithashtu rolin që Serbia kishte luajtur në një sulm në Banjskë në shtatorin e kaluar.
