Deputeti i Lidhjes Demokratike të Kosovës Driton Selmanaj, në seancën e Kuvendit të Kosovës ka pyetur kryeministrin e Kosovës Albin Kurtin, se çfarë qëndrimi ka Qeveria e Kosovës për marrëveshjen e demarkacionit, për të cilën ishte zotuar se do ta rishikojë përsëri, por që sipas Selmanaj, kjo nuk është parë deri tani, raporton InLajmi.
Kryeministri i vendit Albin Kurti, tha se kjo marrëveshje do të bëhet, por pas analizave të detajizuara, derisa theksoi se nuk mund të bartë barrën e gabimeve të qeverive të kaluara.
“Kosova dhe Mali i Zi kanë një marrëveshje mes presidentëve që të bëhet rishikimi në kohën më të përshtatshme për të dyja palet. Në Qeverinë e Kosovës është hartuar raporti me mbi 800 faqe hartografike, por Lëvizja Vetëvendosja së pari parasheh rishikim e pastaj ratifikim. Ne si palë e Republikës së Kosovës së bashku me Malin e Zi pas analizës së raporteve do të bëjmë rishikimin”, tha Kurti.
I pakënaqur me përgjigjen e kryeministrit, Selmanaj ia kujtoi Kurtit se pikërisht për këtë çështje Kosova ndodhet në situatë të rëndë.
“Z.kryeministër kjo nuk është përgjigje, për këtë ju e keni kriju një situatë të rëndë në Kosovës, ju me sjelljet e juaja për këtë çështje i keni vënë në pikëpyetje sigurinë individuale dhe kolektive këtë përgjigje, i keni lanë njerzit pa viza, e sot e tutje ata paguajnë miliona për këtë çështje”, tha Selmanaj.
Selmanaj i tha Kurtit se një ditë do të tërhiqesh edhe nga posti, e kjo siç theksoi ai do të ndodhë shpejt. /InLajmi/
