Vitamina C, e quajtur edhe acidi askorbik, luan shumë role të rëndësishme në trup. Në veçanti, është çelësi për sistemin imunitar, duke ndihmuar në parandalimin e infeksioneve dhe luftimin e sëmundjeve.
Nutricistja, dietologia Ajshe Ibrahimi në një intervistë të shkurtër për Gazetën InLajmi, ka folur lidhur me rëndësinë e madhe që ka vitamina C në shëndetin tonë, si dhe rëndësinë që ka në parandalimin e shumë sëmundjeve.
Gazeta InLajmi: Sa shpesh duhet të marrim vitaminë C?
Ajshe Ibrahimi: Trupi i njeriut nuk e ruan vitaminën C, kështu që njerëzit duhet ta marrin këtë lëndë ushqyese nga dieta e tyre çdo ditë.
Sipas ekspertëve botërorë, sasia ditore e rekomanduar e vitaminës C për të rriturit është, 90 miligramë për meshkujt, 75 miligramë për femra, 85 miligramë gjatë shtatzënisë, 120 miligramë gjatë ushqyerjes me gji, 35 miligramë shtesë për njerëzit që pinë duhan.
Gazeta InLajmi: A ndikon gatimi në uljen e vitaminës C?
Ajshe Ibrahimi: Gatimi mund të zvogëlojë sasinë e vitaminës në fruta dhe perime. Për të humbur sa më pak vitaminë C, rekomandohet zierja në avull apo shumëllojshmëri frutash dhe perimesh të papërpunuara çdo ditë.
Vitamina C është një antioksidant. Kjo vitaminë mbron qelizat e trupit nga dëmtimi i shkaktuar nga radikalet e lira. Radikalet e lira mund të shkaktojnë ndryshime në qeliza dhe ADN që mund të çojnë në sëmundje.
Kjo vitaminë gjithashtu luan një rol kyç në pothuajse të gjitha indet e trupit. Pa vitaminën C, trupi nuk mund të prodhojë kolagjen, një proteinë që është e nevojshme për ndërtimin dhe mirëmbajtjen e kockave të shëndetshme, nyjet, lëkurën, indet e aparatit tretës.
Gazeta InLajmi: Nëse kemi mungesë të vitaminës C, cilat janë pasojat?
Ajshe Ibrahimi: Vitamina C është një pjesë e rëndësishme e sistemit imunitar, i cili mbron kundër viruseve, baktereve dhe patogjenëve të tjerë. Studimet tregojnë se nivelet e ulëta të vitaminës C çojnë në probleme me sistemin imunitar dhe sëmundje të tjera.
Mungesa e vitaminës C mund të rezultojë në një gjendje të quajtur skorbut. Mungesa e vitaminës C, ose skorbuti, mund të shkaktojë dhimbje kyçesh, gjakderdhje nga mishi i dhëmbëve, lodhje, probleme me shërimin e plagëve, depresioni, humbja e dhëmbëve
Gazeta InLajmi: Po cilat janë përfitimet shëndetësore të marrjes së vitaminës C?
Ajshe Ibrahimi: Përfitimet shëndetësore të vitaminës C janë të shumta.
Rritja e shëndetit të zemrës- Disa prova sugjerojnë se vitamina C mund të ndihmojë në uljen e rrezikut të sëmundjeve të zemrës ose komplikimeve të saj. Një studim tregon se njerëzit që konsumojnë më shumë vitaminë C kanë një rrezik më të ulët të vdekjes nga sëmundjet kardiovaskulare. Studiues të tjerë nuk janë të bindur se vetëm vitamina C përmirëson shëndetin e zemrës. Megjithatë, është e qartë se ngrënia e më shumë frutave dhe perimeve mund të ndihmojë në rritjen e shëndetit të zemrës duke siguruar një sërë vitaminash, mineralesh, antioksidantësh dhe fibrash.
Forcimi i sistemit imunitar- Vitamina C ka një efekt forcues imunitar që mund të ndihmojë trupin të luftojë sëmundjet, siç është ftohja e zakonshme.
Pastaj ulja e rrezikut të disa llojeve të kancerit- Vitamina C është një antioksidant, kështu që mund të parandalojë dëmtimet e shkaktuara nga radikalet e lira. Kjo mund të ndihmojë në parandalimin e sëmundjeve të tilla si kanceri.
Gazeta InLajmi: A mund të ndodhë që disa njerëz kanë nevojë më shumë për vitaminën C dhe pse?
Ajshe Ibrahimi: Po, disa njerëz mund të kenë nevojë për sasi më të larta të vitaminës C se të tjerët. Njerëzit që pinë duhan ose janë të ekspozuar ndaj tymit të dorës së 2, për shembull, mund të kenë nevojë për më shumë vitaminë C për të reduktuar dëmtimin e radikalëve të lirë që lëshon tymi.
Grupet e tjera që mund të përfitojnë nga një konsum më i lartë i vitaminës C përfshijnë, personat që nuk hanë mjaftueshëm fruta dhe perime ose që kanë një dietë shumë të kufizuar, njerëzit që nuk janë në gjendje të absorbojnë plotësisht vitaminat dhe lëndët ushqyese, njerëzit me kushte të caktuara shëndetësore, të tilla si sëmundje të veshkave ose kancer.
Gazeta InLajmi: A duhet patjetër të konsultohemi me mjekun për të vitaminën C?
Ajshe Ibrahimi: Nëse dikush nuk mund të marrë mjaftueshëm vitaminë C në dietën e tij, ai mund të konsultohet me mjekun për të marrë suplemente. Vitamina C është e nevojshme për një shëndet të mirë. Për shkak se është e bollshme në shumë ushqime bimore, ngrënia e një diete të shëndetshme që përfshin një shumëllojshmëri frutash dhe perimesh zakonisht i siguron një personi të gjithë vitaminën C që i nevojitet.
Njerëzit që dëshirojnë të rrisin marrjen e vitaminës C mund ta bëjnë këtë duke ngrënë burime të pasura të vitaminës çdo ditë.
Vitaminën C mund ta sigurojmë te frutat dhe perimet si domatet dhe lëngu i domates, patatet, specat e kuq dhe jeshil, kivi, brokoli, luleshtrydhet, lakrat e Brukselit, pjepri, majdanozi, spinaqi, papaja, rrushi i zi, qershia, limoni, trumëza, mandarina, portokalli, ananasi e të tjera ushqime./InLajmi/
