Shkruan: Osman Goranci
Eh, sa shumë gëzohem kur po përfundon fushata parazgjedhore dhe zgjedhore!… Po marrë frymë më lehtë dhe po udhëtoj nëpër Kosovë pa përtesë, ose frikë se do të gaboj diku. Sikur të dini se ç’farë kam hequr një ditë kur në vlugun e fushatës parazgjedhore morra rrugë për në Prishtinë. Në të vërtetë, gjatë vozitjes e kam shprehi ti përcjelli me vëmendje shenjat e komunikacionit.
Kështu, posa hyra në një qytezë, vërejta një pano të madhe ku shkruante; “As majtas e as djathtas por DREJTË!… Pas 50 metrash, shkruante “…DREJTË”, pas dyqind-treqind metrash, sërish vërejta mbishkri-min “…DREJTË”… Ngado që lëvizja timonin e veturës shkruante; “…DREJTË”. Mbi gjysmë ore nuk munda të dal nga qyteza, derisa nuk hasa në një patrullë të policisë!…
– Zotëri, ka kohë që po silleni me veturën tuaj nëpër qytezën tonë. Keni ndonjë problem? – Më pyeti polici që ishte afër veturës.
– Jam në hall zotëri polic. – I thashë disi i lodhur. – Jam nisur për në Prishtinë, mirëpo ka mbi gjysmë ore që po sillem, e nuk po mund të dal nga këtu.
– Nuk po ju kuptoj, zotëri.
– As unë nuk po kuptoj, por!…
– Zotëri, ju lutem m’i jepni dokumentet. – Më tha polici i cili doli nga vetura e policisë. Pasi i mori dokumentet e mia shkoi t’i kontrollojë në kompjute-rin e veturës së policisë. Pas pak doli dhe u afrua tek automobili im.
– Ju qenkeni gazetar?
– Po, zotëri polic.
– Mos jeni të dehur? – Më pyeti disi me dyshim.
– Jo zotëri, nuk pi gjatë vozitjes.
– Mos keni qenë një kohë të gjatë jashtë vendit dhe tani i keni harruar rrugët tona.? – Më pyeti kolegu i tij.
– Jo zotëri, unë shpesh udhëtoj këndej pari, dhe!…
– Jeni mirë me shëndet? – Më pyeti polici që i mbante dokumentet.
– Paj, mirë jam, shëndosh jam. – u përgjegja me buzë të dridhura.
– Atëherë zotëri, pse nuk mund të dilni nga qyteza jonë? – më pyeti njëri nga policët I thashë se në të gjitha rrugët, muret dhe vitrinat e dyqaneve, po has vetëm në mbishkrimet, “As majtas e as djathtas, por DREJTË “, dhe!…
– Zotëri, duhet t’ju shkruaj dënimin, sepse nuk po i njihni shenjat e komunikacionit.
– Nuk i di shenjat! – Disi u befasova. – Zotëri ju e keni gabim!
– Ju lutem pa koment. – Më tha polici tjetër dhe filloi të shkruajë dënimin, 35 euro.
M’u deshtë të hesht dhe të mendoj se si do t’ia bëj që të arrij me kohë në Prishtinë. Ndërsa, sa i përket dënimit, u binda se me të vërtetë e kam merituar, sepse panotë me mbishkrimet “As djathtas e as majtas, por DREJTË”, nuk kishin të bëjnë fare me komunikacionin, por me panotë e një Partie politike.
Merreni me mend, sikur të kisha hasur në panotë e koalicionit!… “Drejtë Evropës”, ku kisha me arritur, edhe pa viza e pasaport.
