Shkruan: Osman Goranci
Me që kishte disa pengesa në të pamurit, Mixha Idriz, një ditë shkon në ambulancën e qytetit, për një kontroll te mjeku i syve.
Pasi e dorëzon në sportel kartonin e pensionistëve, ulet në një karrigë në korridorin e ambulancës dhe ndezë një cigare. Pas një pritjeje të gjatë, motra e thërret mixhën Idriz që të hyn te mjeku për vizitë.
– Mirëdita doktor.
– Mirëdita. Urdhëroni mixhë, uluni këtu, – i thotë mjeku. – Jam doktor Agroni dhe tani më thoni çfarë ju mundon?
– S’mut nuk jam, as dhimje nuk kom doktor. Qysh’se kan hi partizan’t nuk kom shku te doktori, as hapa e as injekci nuk kom marrë. Me hongër, po ha, me pi po pij. Edhe gjumin e kom t’mirë.
– Ju dhemb diku mixhë,- e pyet mjeku.
– Jo, jo, nuk kom dhimje n’trup. Por, dishka me sy nuk jam n’rregull. Ka disa m’uj që nuk po shof mirë.
– Mirë mixhë, ka ilaq edhe për këtë, – I thotë mjeku. – Tani do t’ju shkruaj një udhëzim për specialistin e syve, doktor Memlin. E kam kolegë dhe shokë të mirë. Ai punon në ordinancën private, përballë ambulantës s’onë dhe për pensionistë e ka vizitën vetëm pesë Euro. Është oftamolog shumë i aftë.
– Kush?
– Specialisti i syve mixha Idriz, ashtu i thonë doktorit që i kqyr sytë, – ia sqaron motra.
– Faleminerës bre bir. Koke doktor shumë i mirë dhe i sjellshëm, ashtu qysh kemi qejf na pleqt.
Mixha Idriz e merr udhëzimin dhe del nga ordinanca që të shkojë për kontroll tek okulisti. Mirëpo, pas nja një ore, sërish kthehet në ordinancën e doktor Agronit.
– Hë, mixha Idriz, nuk ishte okulisti aty? – E pyeti motra.
– Aty ke bre motër tunxhi n’zyren e vet.
– A ju kontrolloi mixhë, – e pyeti doktor Agroni.
– Por bre bir, m’kontrolloi. Ma shumë se n’i çerek sahati m’i ka kqyr sytë me disa aparate e me disa bateri. E kishte gojën plotë mjaltë. Edhe për ty bre doktor foli fjalë t’mira.
– Mixha Idriz, po na presin pacientët,- I doktor Agroni. – Me që e kryet vizitën te oftamologu, tani lirisht mundeni të shkoni në shtëpi.
– Mirë, po shkoj be bir. Por dashta me t’thonë se edhe qaj doktori i syve nuk ishte mirë me sy.
– Si mendon mixha Idriz? – E pyet doktor Agroni.
– Doktor, kur e kreva vizitën ia dhashë pesë Euro pa asnji zero, kurse ai ma ktheu kusurin, për pesë euro me n’i zero.
– Pesëdhjetë euro! – Çuditet doktor Agroni.
– Qashtu po’m duket. Por merri qito pare dhe qoja doktorit, – i thotë mixha Idriz. – Kallxoji se edhe ky duhet m’u kqyr te doktori i syve!/InLajmi/
