Telefoni, në ditët e sotme të civilizimit është bërë mjaft i rëndësishëm. Këtë më së miri mund ta dinë ata që nuk e kanë. Mirëpo, për ngushëllim, familjarëve ose atyre që kan lidhje, telefoni mund t’ju përgatisë hiper tensione dhe befasi të ndryshme.
Çka mund të ndodhë kur sillet numri i gabuar, apo kur përzihen lidhjet, e sidomos pas mesnate?
Dini, fqinji im i parë, qysh në orët e para të mëngjesit e kishte dërguar bashkëshorten në spital për lindje. Ai, orë e çast i sillte numrat e telefonit të maternitetit të kuptojë diç, por gjithherë mjeku kujdestar i përgjigjej: “Kini durim zotëri…” Ishte ora dy pas mesnate kur Dini sërish i sjell numrat e telefonit.
– Urdhëroni, – u dëgjua zëri i mjekut kujdestar.
– Zoti mjek, jam unë Dini, Din Therra.
– Po, po, ju njoha zërin zoti Din. Bashkëshortja e juaj është në sallë, dhe…tit, tit…tit, tit… U ndërpre lidhja.
I nevrikosur nga kjo ndërprerje, Dini ndezi një cigare dhe sërish i solli numrat e telefonit.
– Alo!…
– Jam unë, Dini.
– E di zotëri, e prisja thirrjen e juaj. Besoni se unë dhe ekipi im jemi duke punuar që nga mëngjesi që ta sjellim në vete të dashurën e juaj. Besoj se deri në mëngjes, çdo gjë do të jetë në vendin e vet. Me që i ishte fryrë pjesa e parë, e hekurosëm dhe e ngjyrosëm për mrekulli. Disi ia hjekëm edhe kokën!…
– Çka, kokën!? – Dinit filloi t’i ngritet temperatura.
– Menduam se ashtu do të na del më mirë. Ia vumë një kokë tjetër, por që bënë punë. Pastaj, ia ndërruam edhe vajin si dhe e shtrënguam në anën e majtë. Ta dini, se vet jeni fajtor!…
– Unë fajtor?! Nuk po ju kuptoj!
– Zotëri, ju fare nuk keni patur kujdes në gropa dhe në kthesa. Hetuam disi se shufra e cila hynte brenda, ishte shumë e dëmtuar dhe nuk ka pasur mundësi që ta kryej funksionin e vet deri në fund!…
– Unë!?…- Dini piu një gotë ujë, me aspirin. – Unë, nuk e di!…
– Mos u merakosni zotëri. E vumë një shufër tjetër, pak më të gjatë dhe më të trashë se ajo e vjetra, dhe më pastaj e ngarkuam deri në maksimum. Së pari hypa unë, e më vonë edhe katër ndihmësit e mi dhe më besoni se na mbajti të gjithëve. Mirëpo, gjatë lëvizjeve hetuam se diç nuk ishte në rregull me pjesën e prapme. Shkonte në të djathtë gjatë frenimit. Me siguri se e keni ngarkuar më shumë se që lejohet, por, edhe këtë defekt e menjanuam duke i ndërruar amortizatorët. Besoni zotëri se e kemi bërë si nuse të re. Tani e tutje mund ti hipni edhe gjashtë e më shumë veta, dhe nuk do të ndjejë fare peshën. Po ua jap fjalën e nderrit të mekanikut!…
Nga ana tjetër e telefonit, qetësi dhe ankth. Dëgjohej një frymëmarrje e ngadalësuar i njeriut të alivanosur. Eh, çka do të ndodhte me fqinjin tim Dinin, sikur mos të ishte ekipi i ndihmës së shpejtë të ambulancës së qytetit?
