Kombëtarja e Kosovës në konkurrencën e femrave i ka nisur dje përgatitjet për 2 ndeshjet miqësore kundër Lihtenshtajnit, që do të zhvillohen më 13 korrik, përkatësisht më 16 korrik.
Këto 2 ndeshje do t’i shërbejnë përzgjedhëses Anneli Andersen si test përfundimtar para nisjes së edicionit promovues të Ligës së Kombeve në shtator.
“Është ndjenjë shumë e mirë të jemi sërish këtu. Jam e lumtur që i kam takuar lojtaret. Është gjithmonë mirë të fillosh përgatitjet në Kosovë. Ky grumbullim është paksa më sfidues, ngase disa lojtare kanë pasur pushime disa javore, e disa lojtare kanë luajtur edhe në fundjavën që e lamë pas.
Gjithsesi, ne duhet t’i mbledhim forcat dhe të përballemi me Lihtenshtajnin. Duhet të fokusohemi që pas çdo stërvitje dhe pas çdo ndeshje të jemi më të mira. Kemi një kundërshtar që nuk dimë asgjë për të dhe kjo është një sfidë e re, por njëherësh për vajzat është një përvojë e re të luajnë me ekipe të ndryshme.
Sa herë që hyjmë në fushë e kemi qëllim të luajmë mirë dhe të fitojmë. Këto ndeshje na shërbejnë që të përmirësohemi në mbrojtje dhe sulm dhe mendoj se kemi gjasa të mira për fitore”, ka theksuar përzgjedhësja Andersen pas stërvitjes së parë, shkruan Lajmi.net.
Ndërkaq, optimiste për paraqitje të mira në këto 2 miqësore janë shprehur edhe 2 lojtaret, Viola Avduli dhe Donjeta Halilaj. Dardanet do të vazhdojnë me stërvitje sot, derisa 2 ndeshjet miqësore do të zhvillohen në Kampin Nacional në Hajvali.
