Ish-ambasadori i Shqipërisë në Kosovë, Islam Lauka thotë se mostakimi i kryeministrit, Albin Kurti me homologun e tij, Edi Rama, është një zhvillim i padëshirueshëm.
Siç thotë ai, është jonormale që 2 kryeministra të vijnë në një situatë të tillë, të ndodhen në Prishtinë dhe mos të takohen.
“Nuk e imagjinoja që do vinte situata deri këtu. 2 vende vëllezër, një komb, dhe 2 kryeministra të vijnë në një situatë të tillë, që të ndodhen të 2 në Prishtinë dhe të mos takojnë njëri-tjetrin. Është natyrisht jonormale, joserioze dhe që dëmton pa diskutim marrëdhëniet tona por edhe emrin tonë, të 2 shteteve tona”, deklaroi ai
Për këtë çështje, Lauka i “lë faj” kryeministrit Rama, shkruan Teve1
“Nëse duam të vëmë gishtin te një përgjegjës, ai e ka emrin Edi Rama…sepse kryeministri ynë ka një qasje tërësisht të gabuar ndaj Kosovës, qasje që vjen nga botëkuptimi i tij, nga formimi i tij si kozmopolit, si servil i të huajve, në këtë rast i perëndimit, dhe kujton ai që pajtimi shqiptaro – serb mund të bëhet ndërmjet Tiranës dhe Beogardit…duke anashkaluar Prishtinën. Ky është mëkati i tij kryesor”, tha Lauka.
