Shefja e Grupit Parlamentar të LDK’së, Hykmete Bajrami, ka thënë se disa deputetë të VV’së kanë mbledhur shoqatat e biznesit “kinse për të dëgjuar brengat e tyre” për çështjen e liberalizimit të tregut të energjisë.
“Dje, disa prej deputetëve të VV-së në Qeveri kishin mbledhur odat dhe shoqatat e biznesit kinse për të dëgjuar brengat e tyre lidhur me liberalizimin e tregut të energjisë, proces ky që po u rrit faturat deri në 260% për rreth 1300 biznese.”
Bajrami ka thënë se kërkesa e bizneseve është që vendimi për liberalizim të tregut të energjisë të shtyhet për një vit.
“A e dini cila është kërkesa e bizneseve? Kërkesa është që vendimi për liberalizim të tregut të energjisë të shtyhet për një vit – kaq.”
Bajrami ka thënë se në vend që të merret parasysh kërkesa e bizneseve “ata që ende e quajnë veten ministra” kanë thënë se do t’ua subvencionojnë izolimin e ndërtesave.
Ajo ka marrë një shembull të një metal përpunuesi, për të cilin thotë se rryma ëstë 30 për qind e kostos së prodhimit.
“Por, në vend që një kërkesë e tillë të merrej parasysh, ata që ende e quajnë veten ministra paskan thënë se këto biznese do t’i ndihmojnë duke ua subvencionu izolimin e ndërtesave. Merreni me mend: një metal përpunuesi te i cili rryma është 30% e kostos së prodhimit, këta i thonë ta izolojmë ndërtesën dhe të ndihmojnë me vokë ujin. Kaq dinë këta ose kaq mund të thonë, pasi veç prioritet prodhimin vendor nuk e kanë.”
“A e dini se si justifikohen për tregtarët, Qeveria thonë “nuk iu subvencion energjinë korporatave që fitojnë qindra miliona euro”. Si injorantë që janë, këta nuk marrin parasysh faktin se ata prapë do të fitojnë qindra miliona euro, por kostot shtesë do t’i paguajnë qytetarët e vendit, ata me të ardhurat më të vogla, sepse çmimet do të rriten – e do të rriten çmimet e produkteve që shiten më së shumti – do të rriten çmimet e produkteve të konsumit të përditshëm, por as për qytetarët këta nuk mërziten.”
Sipas Bajramit “këto politika janë krejt në favor të mafies energjetike për të cilën deputeti Albin Kurti ka folur para se të bëhej kryeministër”
“Me hy dhe me i analizu të dhënat e tregtimit të energjisë, çdo kush e kupton se këto politika janë krejt në favor të “mafies energjetike”, për të cilën deputeti Albin Kurti ka folur para se të bëhej kryeministër. Qysh atëherë, deputeti Kurti, si inteligjent që është, e ka ditur në tërësi rrjetin e tyre dhe mënyrën e funksionimit. Nga “duaje tënden” në “shkatërro tënden dhe blej nga importi”, metamorfozë si kjo e LVV-së nuk e njeh historia e re politike e Kosovës. Erdhën në pushtet duke rrokullisur kamionë me mallra nga Serbia, hoqën dorë nga pushteti sepse nuk pranonin të hiqej taksa 100% për produktet serbe, e vendosur në kohën kur ishte kryeministër Ramush Haradinaj. Pas më shumë se katër viteve në pushtet, sot janë kundër çdo biznesi vendor dhe në përkrahje të mafies energjetike.”
Bajrami ka shtuar se Kosova ka deficit tregtar rreth 38 miliardë euro për vitet 2001- 2021 dhe 19 miliardë vetëm gjatë qeverisjes Kurti.
“Kosova ka deficit tregtar rreth 38 miliardë euro për vitet 2001 – 2021 dhe i ka 19 miliardë deficit vetëm gjatë qeverisjes së Kurtit. Deputeti Kurti ka shpërndarë qindra miliona të buxhetit për të blerë paqe sociale e vota, por asnjë veprim nuk ka ndërmarrë për ta ndihmuar ekonominë e këtij vendi, e cila do të ndihmonte mirëqenien e secilit qytetar.”
Ajo ka thënë se nesër në ora 14:00 i kanë ftuar shoqatat e biznesit, ZRRE, Autoritetin e Konkurrrencës dhe KESCO’në për të “argumentuar se tash për tash nuk mund të bëhet liberalizimi i tregut të energjisë pa konkurrencë në treg”
“Nesër në ora 14:00, ne i kemi ftuar shoqatat e biznesit, ZRRE-në, Autoritetin e Konkurrencës dhe KESCO-n për të argumentuar se tash për tash nuk mund të bëhet liberalizimi i tregut të energjisë pa konkurrencë në treg, për keqinterpretimin e nenit 37 të Ligjit për Energji Elektrike dhe për t’u zotuar si deputetë se për aq sa është në kompetencën tonë, ne do të merremi seriozisht me këtë çështje. Nëse ka ndonjë shoqatë që s’ka marrë ftesë dhe anëtarët e tyre ndikohen nga ky proces! Jeni të mirëseardhur!”
