Këshilli Kombëtar për Parandalimin dhe Sanksionimin e Dhunës dhe Dukurive Negative në Ngjarjet Sportive ka reaguar pas raportimeve se janë kurdisur rezultatet e 2 ndeshjeve të Superligës së Kosovës në futboll, më konkretisht mes KF Ferizajit dhe KF Dukagjinit dhe KF Trepçës dhe KF Prishtinës, përcjell InLajmi.
Kryetar i Këshillit për Sport, Besim Kelmendi, bëri të ditur se i kanë përcjellë me vëmendje të shtuar zhvillimet e fundit të xhiros së Kampionatit të Kosovës në Futboll ndërsa theksoi se çështjet në fjalë i ka adresuar te prokuroritë kompetente për verifikim dhe hetim të nevojshëm.
Në fund, Kelmendi thekson se opinioni publik do të njoftohet me kohë lidhur me rrjedhën e procesit të votimeve.
Deklarata e plotë nga Këshilli për Sport:
Këshilli Kombëtar për Parandalimin dhe Sanksionimin e Dhunës dhe Dukurive Negative në Ngjarjet Sportive (Këshilli për Sport) me vëmendje të shtuar e ka përcjellë zhvillimin e ndeshjeve të xhiros së fundit të Kampionatit të Kosovës në Futboll, duke përfshirë edhe reagimet e shumta të opinionit sportiv në relacion me dyshimet për kurdisjen eventuale të rezultatit të dy ndeshjeve të Superligës së futbollit të zhvilluara ndërmjet KF Ferizaj – KF Dukagjini dhe KF Trepça 89 – KF Prishtina.
Këshilli për Sport e njofton opinionin publik se çështjet në fjalë i ka trajtuar me urgjencë, dhe dyshimet për kurdisje të rezultatit në dy ndeshjet e sipërshënuara të futbollit janë adresuar menjëherë tek prokuroritë kompetente për verifikimet dhe hetimet e nevojshme.
Opinioni publik do të njoftohet me kohë lidhur me rrjedhën e procesit të hetimeve. /InLajmi/
