Presidenti ukrainas Volodymyr Zelensky shpreson se do të ketë paqe në Ukrainë deri në Pashkë të vitit të ardhshëm, duke iu drejtuar ukrainasve me një urim për festën e Pashkëve, transmeton InLajmi.
“E diela e Pashkëve të vitit të ardhshëm të na gjejë në paqe dhe liri për të gjithë popullin tonë!” tha presidenti ukrainas në video-mesazhin e tij të përditshëm.
“U dëgjofshin lutjet e sinqerta për paqe të gjithë atyre që festojnë sot Pashkët”, tha ai.
Ashtu si anëtarët e tjerë të udhëheqjes ukrainase, Zelensky uroi që festa e Pashkëve t’i gjejë ukrainasit të lumtur.
Në Ukrainë, gjithnjë e më shumë të krishterë tani festojnë festat e tyre sipas ritit perëndimor dhe jo sipas kalendarit të vjetër Julian të Kishës Ortodokse Ruse, e cila nuk feston Pashkët për një javë tjetër, shkruan A.News.
Tradicionalisht, të krishterët ortodoksë në Ukrainë festonin festat e kishës në të njëjtën mënyrë si në Rusinë fqinje. Pas pushtimit të plotë rus të Ukrainës më shumë se një vit më parë, diskutimi publik u bë më i fortë për t’u dalluar më tej nga Rusia duke ndryshuar kalendarin e kishës. /InLajmi/
