Kombëtarja e Kosovës në konkurrencën e femrave ka shënuar fitoren e 2-të në turneun “Turkish National Womens Cup Alanya 2023”. Pas Estonisë, Dardanet kanë triumfuar kundër Kombëtares së Honkongut, madje duke e demoluar me rezultat 7:0.
Fillimi i pjesës së parë ishte i baraspeshuar, por në vazhdim vashat tona kontrolluan më shumë lojën, bashkëvepruan mirë dhe në minutën e 30-të Albulena Guri shënoi për 1:0, duke kaluar Kosovën në epërsi dhe me të cilin rezultat edhe u mbyll pjesa e parë.
Pjesa e 2-të nisi me një mbizotërim të plotë të Dardaneve, të cilat shënuan rrëbesh golash. Fillimisht shënoi Kaltrina Biçkaj në minutën 65-të e cila shënoi edhe në minutën e 79-të. Në vazhdim për 4:0 shënoi Valentina Metaj në minutën 85-të. Serinë e golave e vazhdoi Jehona Shala e cila shënoi në minutën 89-të dhe 91-të dhe në fund për ta përmbyllur rezultatin prej 7 golave u kujdes Donjeta Halilaj që sot barte edhe shiritin e kapitenit.
Përzgjedhësja Andersen në këtë takim provoi përbërjen e 2-të, duke e pushuar përbërjen e parë për ndeshjen e fundit kundër Bullgarisë që llogaritet kombëtare më cilësore, përcjell lajmi.net.
Ndeshja kundër Bullgarisë zhvillohet më 21 shkurt në ora 11:00 sipas kohës lokale të Kosovës.
