Kryetari i Sindikatës së Bashkuar të Arsimit të Kosovës, Rrahman Jashari, nuk beson se vlera e koeficientit të pagës do të jetë më e ulët se 120 euro, edhe pse sipas tij bazuar me gjendjen sociale, rritjen e çmimeve dhe pagat e ulëta të punonjësve vlera e koeficientit do të duhej të ishte më e lartë se 120 euro në mënyrë që të ketë një rritje të pagave dinjitoze, shkruan InLajmi.
Sipas tij, në rast se vlera e koeficientit do të jetë nën 120 euro, veprimet momentale sindikale do të jenë vetëm në mënyrë deklarative, por nuk parlajmëron veprime të tjera sindikale në kundërshtim të vlerës së koeficientit më të ulët se 120 euro.
“Në emër të SBASHK-ut ajo çka mund të them është që koeficienti së paku të mos jetë më i ulët se 120 euro, e i cili do të bënte rritje të njëjtë të pagave ndërsa do të duhej që koeficienti të ishte më i lartë se 120. Po ndodhi e kundërta që vlera e koeficientit të jetë më e ulët nuk do ta fshehim pakënaqësinë e punëtorëve, të cilët po e presin ligjin e ri me këtë edhe ngritje pozitive të pagave”, tha Jashari për InLajmin.
Tutje, Jashari thotë se SBASHK-u ka dhënë kontributin për Ligjin e Pagave, ndërsa theksoi se sa i përket vlerës së koeficientit nuk kemi informata dhe pikërisht për këtë çështje ne kemi zhvilluar takime edhe me sindikalistët nëpër komuna të Kosovës për të parë deponimin se cila vlerë është e pranueshme.
Jashari, bëri të ditur se kryeministri Albin Kurti është takuar me kryetarit të BSPK-së Atdhe Hykollit e të cilit i ka premtuar se shumë shpejt do të bëhet e ditur vlera e koeficientit të pagës por nuk ka dhënë shifër.
Sipas Jasharit, premtimi i kryeministrit Kurti po jetësohet meqë javën e ardhshme pritet që vlera e koeficientit të shkojë për miratim në Kuvendin e Kosovës.
“Për këtë edhe ne si SBASHK kemi filluar takimet tona nëpër komuna me anëtarët sindikalë dhe pyetja e cila bëhet është se sa do të jetë paga e të punësuarve, por ne nuk e dimë. Kryetari i BSPK-së Atdhe Hykolli, ka marrë premtimet nga kryeministri se shumë shpejt do të bëhet publike vlera e koeficientit të pagës dhe këtë e ka përforcuar edhe shefja e Grupit Parlamentar të Vetëvendosjes, Mimoza Kusari-Lila e cila ka thënë se gjatë kësaj jave në Kuvend do të shkojë për votim vlera e koeficientit”, tha Jashari për InLajmin.
Tutje Jashari shpreson se qeveria do të reflektojë që vlera e koeficientit të mos jetë më e ulët se 120 euro.
“Në emër të anëtarësisë po e them edhe unë se koeficienti në vlerën prej 120 euro e bënë një lëvizje pak më të dukshme të pagave, prandaj edhe uroj që qeveria të reflektojë në këtë edhe të shkojë edhe mbi vlerën120 euro, e cila do të ishte një lajm i mirë dhe në shkurt edhe punëtorët e arsimit, por edhe shërbyesit e tjerë civil t’i gëzohen Ligjit të Pagave, i cili do t’u sillte atyre paga më të larta se sa që i kanë për momentin”, tha ai.
I pyetur se çfarë veprime do të marrin nëse vlera e koeficientit nuk do të jetë më pak se 120 euro, Jashari tha se sindikatat do të marrin vendime të reja, por që për momentin nuk ka disponim për veprime të tjera sindikale përveç reagimit deklarativ.
“Në rast se vlera e koeficientit të pagës nuk do të jetë 120, ne do të reagojmë në emër të anëtarësisë deklarativisht, por veprime të tjera sindilake tani për tani nuk mendojmë të marrim sepse edhe gjatë takimeve me anëtarësinë sindikale apo të shoqatave nuk është kërkuar të veprojmë apo reagojmë ndryshe, për momentin nuk mendohet për ndonjë veprim tjetër sindikal”, tha Jashari për InLajmin.
Ndryshe, vlera e koeficientit ende mbetet “fshehtësi” e qeverisë, ndërsa pritet që javën e ardhshme vlera e koeficienti do të deklarohet para deputetëve të cilët pastaj do të votojnë pro apo kundër mbetet të shihet./InLajmi/
