Deputetja e PDK-së Ganimete Musliu, ka kritikuar Qeverinë e Kosovës për mosndërmarrjen e ndonjë veprimi në Komunën e Skenderajt, e cila është prekur dhe dëmtuar shumë nga vërshimet, përcjell InLajmi.
Musliu derisa tregon për gjendjen e vështirë të qytetarëve të Skenderajt fajëson qeverinë për mosmbajtjen e përgjegjësive për të ndihmuar këtë komunë në tejkalimin e kësaj katastrofe natyrore.
Deputetja vlerëson se Drenica po mbetet e braktisur nga shteti, pasi as FSK-ja e as Kryqi i Kuq nuk po u dalin në ndihmë qytetarëve.
Në acarim e sipër për mosreagim nga qeveria, Musliu tregon edhe pyetjen që qytetarët po bëjnë këto ditë drejtuar qeveritarëve “A nuk po dijnë apo më të vërtetë janë të poshtër ata që mbajnë përgjegjësi për situata të tilla”.
Postimi i plotë i saj:
Përballë katastrofës natyrore, Drenica e braktisur nga shteti!
Vërshimet që ndodhën në qytetin e Skenderajt dhe shumë fshatra përrreth shkaktuan dëme shkatërruese. Pamjet të japin një ndjenjë të trishtë. Qytetarët gjenden përballë ekzistencës së tyre të shkatërruar brenda pak orëve. E në gjithë këtë situatë të jashtëzakonshme në mes të mbetjeve dhe shkatërrimeve ajo që vërehet më së shumti dhe ajo që prek më së shumti zemrat e drenicasëve është mungesa e shtetit, mungesa e ekipeve emergjente, sidomos nëpër fshatra.
Me të drejtë këta qytetarë bëjnë pyetjen: A nuk po dijnë apo më të vërtetë janë të poshtër ata që mbajnë përgjegjësi për situata të tilla.
Me të drejtë pyes edhe unë: Ku është qeveria, FSK-ja, Kryqi i Kuq etj..
Komuna e Skenderajt është duke u angazhuar me të gjitha kapacitetet që ka, por për t’ia dalur i duhet ndihma nga institucionet shtetërore, ndihmë kjo e cila po mungon.
Për fund dua të falenderoj të gjithë njerëzit e vullnetit të mirë që po bashkëndjejnë me ne dhe po na ndihmojnë me gjërat më të nevojshme. /InLajmi/
