Trepça ka mundur Rahovecin me rezultat 82-66 (25:22, 26:7, 13:25, 16:14), duke u kualifikuar në gjysmëfinale të Superkupës së Kosovës.
Mitrovicasit e nisën më mirë ndeshjen dhe kishin epërsi deri në 8 pikë, por në fund të çerekut të parë, rahovecasit me një seri të suksesshme ngushtuan shifrat në 25:22, sa përfundoi kjo pjesë. Por, shkëputja e madhe e ‘Xehetarëve’ u bë në periudhën e 2-të, ku ishin bindshëm më të mirë dhe lejuan ‘Vreshtarët’ të shënojnë vetëm 7 pikë për 10 minuta, ndërsa skuadrat shkuan në pushim me shifrat 51-29.
Megjithatë, skuadra nga Rahoveci nuk u dorëzua dhe ishin më të mirë në periodën e 3-të, për të tentuar përmbysjen e madhe, ndërsa shifrat pas 30 minutash ishin 66:52. Në 10 minutat e fundit, u zhvillua lojë kryesisht e barabartë, me Vreshtarët që synonin rikthimin dhe mitrovicasit që ruajtën epërsinë dhe triumfuan 82-6, ndërsa në gjysmëfinale e presin fituesin e ndeshjes Peja-Bashkimi, shkruan Telegrafi.
Te Trepça u dalluan Drilon Hajrizi me 19 pikë e shtatë kërcime dhe Erjon Kastrati me 15 pikë e 7 asistime, kurse te Rahoveci më i miri ishte Jahi Carson me 20 pikë e 5 asistime.
