Deputetja e Partisë Demokratike të Kosovës, Ariana Musliu-Shoshi ka reaguar për mos dhënien e vizave për Kosovën nga Bashkimi Evropian, përcjell InLajmi.
Musliu-Shoshi ka thënë se është e çuditshme që Bashkimi Evropian vazhdon ta mbajë të izoluar popullin e Kosovës që jeton në mes të Evropës.
Deputetja tha se Kosova humbi shansin e saj ideal për liberalizimin e vizave në vitin 2016 kur u pengua nga kryeministri aktual, Albin Kurti.
Tutje ajo tha se qeveria aktuale duhet të ketë strategji që të loboj për liberalizimin e vizave.
Postimi i plotë i saj:
Imagjinoni, Bashkimi Evropian vazhdon ta mbajë të izoluar popullin e Kosovës që jemi më pak se 2 milionë qytetarë dhe jetojmë në mes të Evropës. Ndërsa kjo BE u ka hequr vizat edhe Argjentinës, Andorrës, Brazilit, Kolumbisë, Guatemalës, Peru e Venezuelës.
Kosova e humbi shancin e saj ideal kur i plotësoi të gjitha kriteret më 2016, por u pengua nga brenda prej deputetëve e kryeministrit aktual të cilët kur ishin opozitë e sulmonin shtetin e Kosovës me të gjitha mjetet e dhunshme për ta bllokuar demarkacionin e kufirit.
Përderisa e presim trenin e radhës, kjo qeveri duhet të paktën të dijë të loboj, të ketë strategji e plan, të dijë ta trajtojë interesin kombëtar e të jemi të bashkuar në rrugën drejt integrimit evropian./InLajmi/
