Banka Qendrore Evropiane (BQE) planifikon të rrisë normat e interesit, në mënyrë që të kundërshtojë inflacionin e lartë rekord të nxitur nga lufta në Ukrainë, transmeton InLajmi.
Banaka Qendrore i mbajti të pandryshuara normat në mbledhjen e sotme, por konfirmoi se e ka në plan të rrisë normat gjatë muajit korrik. Ajo tha sot se po shikon për një rritje prej 0.25% për muajin e ardhshëm.
“Këshilli Drejtues synon të rrisë normat bazë të interesit te Banka Qendrore me 25 pikë bazë në mbledhjen e tij të politikës monetare të korrikut. Ndërkohë, Këshilli Drejtues vendosi të lërë të pandryshuara normat e interesit për operacionet kryesore të rifinancimit dhe normat e interesit për kredinë marxhinale dhe atë të depozitave përkatësisht në 0.00%, 0.25% dhe -0.50%. Duke parë më tej përpara, Këshilli Drejtues pret të rrisë përsëri normat kryesore të interesit të BQE-së në shtator,” tha Banka Qendrore.
Njoftimi vjen pasi inflacioni vjetor midis 19 vendeve që përdorin euron arriti në 8.1% në maj, një nivel më i lartë historik.
“Inflacioni i lartë është një sfidë e madhe për të gjithë ne. Këshilli Drejtues do të sigurohet që inflacioni të kthehet në objektivin e tij prej 2% në periudhën afatmesme”, tha Banka Qendrore, shkruan CNN.
Banka Qendrore Evropiane gjithashtu uli ndjeshëm perspektivën e rritjes së eurozonës në krahasim me parashikimet e saj të marsit. Tani ajo pret rritje vjetore reale të PBB-së në 2.8% në 2022 dhe 2.1% në 2023. Në takimin e marsit ajo kishte parashikuar që ekonomia të rritet me 3.7% në 2022 dhe 2.8% në 2023. /InLajmi/
