Mikhail Fridman, themeluesi i një prej institucioneve më të mëdha financiare private ruse, Alpha Bank, i shkroi stafit me bazë në Londër të kompanisë së tij private LetterOne se “lufta nuk mund të jetë kurrë zgjidhja”, transmeton InLajmi.
Fridman, i cili ka një pasuri rreth 11.7 miliardë dollarë (8.7 miliardë £), ka lindur në qytetin perëndimor të Ukrainës, Lviv dhe tha: “Unë jam thellësisht i lidhur me popujt ukrainas dhe rusë dhe e shoh konfliktin aktual si një tragjedi për të 2. ”
Ndërkohë, Oleg Deripaska, i cili drejton gjigantin e aluminit Rusal, shkoi në mediat sociale për të bërë thirrje për negociata.
Deripaska, i cili ka grumbulluar një pasuri prej rreth 4 miliardë dollarë (2.9 miliardë £) dhe dikur u përshkrua si “industrialisti i preferuar i Putinit”, shkroi në Twitter se “paqja është përparësia”.
Dhe Oleg Tinkov, një bankier që vlerësohet të ketë vlerë rreth 3 miliardë dollarë (2.2 miliardë £), mbajti qëndrimin më të theksuar kur postoi një foto të familjes së tij në Instagram me mbishkrimin “ne jemi kundër kësaj lufte”, duke shtuar se “njerëz të pafajshëm janë duke vdekur çdo ditë, kjo është e paimagjinueshme dhe e papranueshme”, shkruan BBC.
Forbes vlerësoi të enjten se 116 miliarderë kishin humbur tashmë më shumë se 126 miliardë dollarë që nga 16 shkurti dhe njeriu më i pasur i Rusisë, Vladimir Potanin, humbi personalisht 3 miliardë dollarë në një tregtim të vetëm javën e kaluar. Që atëherë, tabloja ekonomike është përkeqësuar. /InLajmi/
