Prishtina ka shënuar fitore ndaj Penzës në udhëtim me rezultat 82:87 (20:22, 22:21, 21:23, 19:21), në xhiron e 15-të të Superligës së Femrave.
Çereku i parë ishte i baraspeshuar, ku epërsinë më të lartë e kishin prishtinaset, 6 pikë, 12:18 dhe 16:22, megjithatë, 4 pikë në fund nga pejanet bënë që kjo pjesë të përfundojë 20:22. Edhe periudha e 2-të u karakterizua si shumë e baraspeshuar, pa arritur shkëputjen e madhe asnjëra skuadër, ndërsa shkuan në pushim me shifrat 42:43.
Bardhekaltret e nisën më mirë periodën e 3-të, duke pasur epërsi në 9 pikë, 49:58, megjithatë, vendaset rikthehen shpejt për të barazuar shifrat në 58:58, kurse rezultati në semafor pas 30 minutash ishte 63:66.
Por, në 10 minutat e fundit dhe vendimtare, skuadra e Prishtinës ishte në epërsi konstante për të mos e rrezikuar fitoren dhe duke triumfuar me shifrat 82:87, çka ishte fitorja e 15-të në po aq ndeshje të zhvilluara, kurse pejanet kanë 11 fitore e katër humbje.Te Penza u dalluan Valbona Bytyqi me 23 pikë e 11 kërcime, Rael Whitsitt me 13 pikë e 13 kërcime, Jeta Zeka me 16 pikë dhe Narlyn Mosquera me 18 pikë e 9 kërcime, kurse te Prishtina u dalluan Arbnore Përquku me 23 pikë, 9 kërcime e 10 asistime dhe Agnesa Rrahmani me 26 pikë e 7 kërcime.
Ndërkohë, në ndeshjet tjera, Bashkimi ka shënuar fitore ndaj Trepçës me rezultat 71:47 (15:5, 21:7, 22:18, 13:17), ku prizrenaset ishin më të mira nga fillimi deri në fund për të shënuar fitore të merituar. Te skuadra prizrenase u dallua D’asia Chambers me 18 pikë e 8 kërcime, kurse te ajo mitrovicase Kelly Santos me 10 pikë e 10 kërcime. Bashkimi ka10 fitore e 5 humbje, ndërkohë, Trepça ka 5 fitore e 10 humbje.
Vëllaznimi ka mundur Kastriotin me shifrat 117:53 (23:16, 27:3, 38:15, 29:19). Te skuadra kuqezi u dallua kapitenia Rina Hoda me 25 pikë, 8 kërcime, 20 asistime dhe 12 topa të vjedhur, ndërsa te skuadra ferizajase u dallua Anita Grainca me 29 pikë e 22 kërcime, shkruan Indeks Online.
Vëllaznimi ka 4 fitore e 11 humbje, ndërsa Kastrioti numëron 15 humbje në 15 ndeshje.
