Policia e Kosovës ka bërë të ditur se në Mitrovicën e Jugut janë sekuestruar edhe 67 aparate për prodhimin e kriptovalutave, përcjell InLajmi.
Sipas njoftimit të Policisë, bastisja është kryer në një banesë më saktësisht në rrugën ‘’Fan Noli’’.
Ndryshe Polica e Kosovës ka bërë me dije se personi që posedonte këto aparate është identifikuar, ndërsa lidhur me këto pajisje është njoftuar prokurori i çështjes i cili ka dhënë si sugjerim që me hetimet e këtij rasti të merren autoritetet doganore.
Njoftimi i plotë nga Policia e Kosovës:
Policia në Mitrovicën e Jugut sekuestron 67 aparate për prodhimin e kriptovalutave
Mitrovicë, 6 janar 2022
Hetuesit e Sektorit Rajonal të Hetimeve në kuadër të Drejtorisë Rajonale në Mitrovicën e Jugut, nën dyshime të arsyeshme për veprimtari të kundërligjshme në orët e pasdites së sotme kanë realizuar një bastisje.
Si rezultat i hetimeve është arritur të lokalizohet dhe identifikohet lokacioni, me ç’rast bastisja është realizuar në një banesë në rrugën ‘Fan Noli’ në Mitrovicën e Jugut. Gjatë bastisjes për veprimtari të kundërligjshme janë gjetur dhe sekuestruar 67 aparate të lidhura me pajisje elektrike dhe internet që dyshohen se përdoreshin për prodhimin e kriptovalutave.
Për pajisjet e gjetura dhe veprimtarinë e kundërligjshme hetuesit policor kanë identifikuar personin e dyshuar.
Lidhur me veprimet e ndërmarra dhe pajisjet e sekuestruara është njoftuar prokuroi i çështjes i cili ka sugjeruar që për veprime të mëtejme hetimore lidhur me rastin dhe pajisjet e sekuestruara të merren autoritetet doganore./InLajmi/
