Qeveria e Kosovës të martën ndaloi prodhimin e kriptovalutave në një përpjekje për të frenuar konsumin e energjisë elektrike, shkruan InLajmi.
Krejt kjo pasi që vendi po përballet me krizën më të rëndë të energjisë në një dekadë për shkak të ndërprerjeve të prodhimit.
Lidhur me këtë në një prononcim për Gazetën InLajmi profesori i Ekonomisë, Musa Limani ka thënë se ndalimi i prodhimit të kriptovalutave nuk mendon se është arsyeja kryesore që kursen energjinë elektrike.
“Mendoj se nuk ka ndonjë peshë prodhimi i kriptovalutave për energjinë elektrike. Sigurisht se i kanë arsyet konkrete ata që e kanë marrë vendimin por nuk mendoj se kjo është arsyeja kryesore ose arsyeja për të ndaluar prodhimin e kriptovalutave”, tha Limani për Gazetën InLajmi.
Ai theksoi se do të ishte më e drejtë që të merren masat që edhe pjesa veriore e Mitrovicës, pra serbët të paguajnë rrymën e shpenzuar.
“Ndërprerja e prodhimit të kriptovalutave duhet të jetë në aspektin e sigurimit të tregut financiarë në Kosovë, pra në aspektin ekonomik, ky do të ishte arsyetimi”,tha tutje ai.
Ndryshe, dje ministrja e Ekonomisë, Artane Rizvanolli tha se institucionet e rendit do të ndalojnë prodhimin e kriptovalutave me mbështetje të të gjitha institucioneve relevante të cilat do të identifikojnë lokacionet e prodhimit të kriptovalutave.
Këto obligime tha ajo kanë për qëllim trajtimin e çfarëdo mungese të papritur ose afatgjatë të kapacitetit prodhues energjetik, kapacitetit të transmetimit apo të shpërndarjes së energjisë në mënyrë që të tejkalojmë krizën e energjisë pa rënduar më tej qytetarët e Republikës së Kosovës./InLajmi/
