Rrjeti social Facebook do t’i japë fund politikës së tij për të përjashtuar udhëheqësit botërorë nga rrjeti, por sipas rregullave të reja do të kontrollojë publikimet e tyre, transmeton InLajmi.
Masat e reja njoftohen vetëm disa javë pasi Bordi i Pavarur i Mbikëqyrjes së kompanisë, mbështeti vendimin për pezullimin e llogarisë së ish-presidentit amerikan, Donald Trump.
Kompanisë së Mark Zuckerberg i ishte dhënë afat deri në 5 Qershor, për t’iu përgjigjur rekomandimeve të dhëna nga Bordi Mbikëqyrës.
Facebook si dhe Twitter, kanë deklaruar më parë publikisht se ata nuk mbështesin censurimin e liderëve botërorë në platformat e tyre, edhe nëse postimet e tyre nuk lejohen për një përdorues të rregullt.
Megjithatë, sipas politikave të reja, postimet e bëra drejtpërdrejtë nga politikanët thuhet se ende nuk do të kontrollohen me fakte, por për herë të parë ato do t’i nënshtrohen kontrollit për gjëra të tilla si bullizmi dhe ngacmimet.
Sipas The Independent, platforma e Facebook gjithashtu planifikon të informojë përdoruesit para se t’i çojë në pezullim.
Kujtojmë se ish-presidenti amerikan Trump, është pezulluar nga rrjeti për një kohë të pacaktuar pas sulmit të 6 Janarit në Kapitol të SHBA-së.
Ndërkohë, këtë vendim e kishte mbështetur edhe Bordi Mbikëqyrës, i cili përbëhet nga media dhe ekspertë të tjerë, por ishte deklaruar se kompania kishte gabuar duke e bërë pezullimin me kohë të pacaktuar./InLajmi/