Posta e Kosovës të enjten ka promovuar 2 pulla postare me figurat e Leze Qenës dhe Besim Sahatçiut, raporton InLajmi.
Kryeshefi ekzekutiv i Postës së Kosovës, Xhevdet Smakiqi gjatë këtij promovimi tha se është privilegj i madh që postës i janë shtuar 2 pulla postare me figurat e personaliteteve të shquara.
“Është privilegj i madh i Kosovës që Postës i janë shtuar 2 pulla postare të 2 personaliteteve shumë të shquara të regjisorit Besim Sahatçiu dhe aktores së mirënjohur Leze Qena”.
Ndërsa djali i regjisorit Besim Sahatçiut, Besniku tha se ndjehet i emocionuar për këtë dokumentar dhe organizim.
“Jam i emocionuar për këtë dokumentar dhe organizim. Vajza ime Rita ishte me punë, por ju dërgon të fala përmes një videoje, që Rita kishte dërguar”.
Teksa vajza e aktores së ndjerë Leze Qena, Argjenda tha se ky organizim rastisi të jetë në një vjetorin e vdekjes së nënës së saj.
“Rastisi edhe me një vjetorin e mëmës dhe jam shumë e emocionuar për këtë organizim”.
Ish-ministrja e Kulturës dhe Sportit Vlora Dumoshi vlerësoi lartë punën dhe kontributin e Qenës dhe Sahatçiut në kinematografinë shqiptare.
“Ishte kënaqësi por gjithashtu edhe një emocion i veçantë sidomos për mua si ish-ministre sot është edhe një vjetori i shkuarjes në amshim të z.Leze Qena të një artisteje të shkëlqyer e cila gjithmonë ka mbjell gëzim me rolet e saj, por gjithsesi edhe i madhi Besim Sahatçiu i cili ka bërë një punë fantastike me filmat të cilat i ka bërë me vite me radhë”.
