Presidenti i Turqisë, Recep Tayyip Erdogan, ka kritikuar ashpër veprimet e Izraelit në Lindjen e Mesme, gjatë fjalimit të tij në sesionin e 51-të të Organizatës së Bashkëpunimit Islamik, që po mbahet në Stamboll, transmeton Sinjali.
Duke folur para liderëve të vendeve islame, Erdogan ka akuzuar Izraelin për një politikë të vazhdueshme shkatërrimi dhe pushtimi në dy vitet e fundit, që ka gjetur mbështetje të pakushtëzuar nga vendet perëndimore.
“Për dy vite rresht, Izraeli ka ndjekur politika të shkatërrimit, pushtimit dhe dhunës, dhe për këtë ka marrë mbështetje të pakushtëzuar nga vendet perëndimore,” ka thënë ai.
“Izraeli nuk ka sulmuar vetëm Gazën, por edhe Libanin, Jemenin dhe Sirinë. Tani, edhe fqinji ynë Iran është përballë terrorizmit shtetëror izraelit,” shtoi Erdogan.
Presidenti turk ka cilësuar qeverinë e Benjamin Netanyahu-t si “pengesën më të madhe për paqen rajonale” dhe ka dënuar ashpër sulmet izraelite ndaj Iranit.
Ai gjithashtu ka shprehur shqetësim të madh për sulmet ndaj Xhamisë Al-Aksa, vendi i parë i shenjtë për myslimanët.
“Shënjestrimi i shenjtërisë së Qiblës sonë të parë, Xhamisë Al-Aksa, dhe përpjekjet për të uzurpuar këtë shenjtëri janë të papranueshme,” ka deklaruar Erdogan.
Në një krahasim të fortë historik, Erdogan ka paralajmëruar se ambiciet sioniste të Netanyahu-t mund të kenë pasoja katastrofike globale.
“Ashtu si shkëndija e ndezur nga Hitleri 90 vjet më parë që dogji botën, po ashtu edhe ambiciet sioniste të Netanyahu-t nuk kanë tjetër qëllim veçse të tërheqin botën drejt një katastrofe,” ka theksuar ai.
Në përfundim të fjalës së tij, Erdogan u ka bërë thirrje vendeve me ndikim mbi Izraelin të mos bien pre e propagandës dhe ka kërkuar që zgjidhja të vijë përmes dialogut dhe jo dhunës: “U bëj thirrje vendeve me ndikim mbi Izraelin të mos dëgjojnë helmimin e tij. Zgjidhja duhet të vijë përmes dialogut,” ka përfunduar Erdogan.
