Komuna e Ferizajt ka apeluar qytetarët e saj që të kenë kujdes më të shtuar në qarkullimin rrugor për t’ iu shmangur rreziqeve që mund të kanosen si pasojë e reshjeve, përcjell InLajmi.
Po ashtu ka njoftuar se nga ekipet që po punojnë në terren, konstatohet se asnjë lokalitet aktualisht nuk është i bllokuar tërësisht në qarkullimin rrugor.
“Reshjet e dendura e të pandërprera të shiut mbrëmë, po paraqesin vështirësi qarkullimi në disa nga akset rrugore të Ferizajt. Kjo si rrjedhojë e vërshimit në disa pjesë të qytetit dhe fshatrave që pamundëson qarkullimin normal të mjeteve motorike dhe këmbësorëve. Duke marr për bazë këtë gjendje, këtë fatkeqësi natyrore që ka përfshirë gjithë vendin tash e sa ditë, kërkohet shtimi i kujdesit nga ana juaj në qarkullimin rrugor duke shmangur rreziqet eventuale nga vërshimet. Nga ekipet që po punojnë në terren, konstatohet se asnjë lokalitet aktualisht nuk është i bllokuar tërësisht në qarkullimin rrugor”,njofton komuna.
Ndër të tjera nga komuna njoftojnë se që nga orët e hershme të mëngjesit, ekipet e emergjencave publike janë në terren dhe po bëjnë të gjitha përpjekjet për të sanuar gjendjen.
“Gjithashtu, ju bëjmë të ditur, se që nga orët e hershme të mëngjesit, por dhe në ditët paraprake, ekipet e emergjencave publike, janë në terren dhe po bëjnë të gjitha përpjekjet për të sanuar gjendjen, ndonëse reshjet e shiut janë të pandalshme edhe tani. Pra, autoritetet janë në krye të detyrës duke monitoruar dhe vepruar konform situatës, andaj çdo tentativë për të bërë politikë me fatkeqësi të tilla natyrore, nuk i shërben situatës, përkundrazi”.
Kujdesi më i shtuar sipas apelit të komunës duhet të jetë në afërsi të zonave malore.
“Apelojmë tek qytetarët që shtojnë kujdesin në qarkullimin e tyre në akset rrugore ku janë hasur vështirësi kalimi nga vërshimet, si dhe njëkohësisht kërkojmë që të shmangen lëvizjet jo të domosdoshme në akset rrugore në afërsi të zonave malore për të parandaluar rreziqet eventuale”,thuhet në njoftimin e komunës./InLajmi/.
