Kryeministri në detyrë, Avdullah Hoti, ka reaguar pas reshjeve të fundit që kanë shkaktuar dëme në disa komuna të Kosovës, përcjell InLajmi.
Hoti ka njoftuar se ka vizituar sot Qendrën e Situatave, ku ka parë nga afër me gjendjen nëpër komuna, pas reshjeve të fundit të shiut dhe të borës të cilat kanë shkaktuar vërshime në shumë rajone të vendit.
Në takim me drejtorin e kësaj qendre, Shaqir Shaqiri, dhe sekretarin e Sekretariatit për Siguri, Shpend Tërdevaj,
Hoti ka diskutuar për masat që duhet të ndërmerren me qëllim të menaxhimit sa më të mirë të situatës së krijuar.
Postimi i i plotë i tij:
Me qëllim të koordinimit për menaxhim sa më të mirë të situatës së krijuar nga reshjet e fundit të shiut dhe të borës, të cilat kanë shkaktuar vërshime në shumë rajone të vendit, sot vizitova Qendrën e Situatave ku nga drejtori Shaqir Shaqiri dhe sekretari i Sekretariatit për Siguri, Shpend Tërdevaj u njoftova nga afër me gjendjen nëpër komuna.
Institucionet e Kosovës janë duke u përcjellë nga afër situatën dhe të gjitha kapacitetet shtetërore janë vënë në gjendje gatishmërie, përfshirë këtu Agjencinë për Menaxhimin e Emergjencave, Shtabet Lokale dhe Forcën e Sigurisë së Kosovës.
Unë jam në komunikim edhe me komandantin e KFOR-it, Gjeneral-Majorin, Franco Federici, i cili ka shprehur gatishmërinë për të ofruar ndihmën e forcës paqeruajtëse nëse një gjë e tillë do të jetë e nevojshme.
Për të parë nga afër situatën e krijuar nga reshjet e fundit të cilat kanë shkaktuar vërshime në rajone të ndryshme të vendit, sot në orën 12:30 do të vizitoj fshatin Dobroshec të Komunës së Drenasit./InLajmi/
