Federata e Futbollit të Kosovës ka reaguar shpër pas djegies së flamurit të Greqisë nga ana e tifozëve “Skifterat” të Gjilanit, përcjell InLajmi.
‘Skifterat’ dogjën flamurin grek pak minuta përpara se të fillonte ndeshja Gjilani- APOEL, në kuadër të Ligës së Evropës.
“Grupi i tifozëve “Skifterat” deri tash nuk është shquar për akte të tilla apo për dhunë, andaj edhe individët që e kanë kryer këtë akt të turpshëm besojmë që nuk kanë lidhje me këtë grup të tifozëve”, thuhet ndër tjera në komunikatën e FFK-së.
Në fund të regimit të FFK-së thuhet se “Pikërisht në fillim të muajit të ardhshëm Kosova do të ballafaqohet me Greqinë në kuadër të Ligës së Kombeve dhe si në çdo ndeshje tjetër, edhe këtë herë do të dëshmojmë se jemi vend i vlerave sublime dhe popull mikpritës”
Reagimi i plotë i FFK-së pa ndërhyrje:
Federata e Futbollit e Kosovës e dënon fuqishëm aktin e djegies së flamurit të Greqisë në sheshin e kryeqytetit nga disa individë të pandërgjegjshëm, e që thirren në përfaqësim të një grupi të tifozëve, pas ndeshjes së mbrëmshme Gjilani – Apoel. Grupi i tifozëve “Skifterat” deri tash nuk është shquar për akte të tilla apo për dhunë, andaj edhe individët që e kanë kryer këtë akt të turpshëm besojmë që nuk kanë lidhje me këtë grup të tifozëve.
Njëherësh, konsiderojmë se ky akt i shëmtuar nuk ka asgjë të përbashkët me kulturën dhe idealet e popullit tonë. Çdo sjellje e tillë është në kundërshtim me vlerat tona dhe ambicien për të qenë pjesë e familjes së shteteve demokratike evropiane.
Me këtë rast, kërkojmë nga organet e rendit që të vihen në kërkim të individëve që e kanë kryer këtë akt të shëmtuar, i cili e prish imazhin e futbollit dhe të shtetit tonë.
Kosova është shndërruar në storie të suksesit dhe shembull për të mirë duke iu falënderuar paraqitjeve të shkëlqyeshme të Kombëtares sonë, por edhe animit korrekt të tifozëve tanë “Dardanët” në çdo ndeshje e stadium, prandaj është e patolerueshme të lejojmë të na ndodhin akte të tilla si kjo e mbrëmshmja dhe aq më parë nga individë që veten e quajnë tifozë futbolli.
Pikërisht në fillim të muajit të ardhshëm Kosova do të ballafaqohet me Greqinë në kuadër të Ligës së Kombeve dhe si në çdo ndeshje tjetër, edhe këtë herë do të dëshmojmë se jemi vend i vlerave sublime dhe popull mikpritës./InLajmi/
