Në korporatën Energjetike të Kosovës (KEK) janë infektuar 9 punëtor me koronavirus, njëri prej tyre po trajtohet në QKUK derisa 8 të tjerë janë izoluar, gjendja e personave që janë në vetizolim është stabile, shkruan InLajmi.
Drejtori i Zyrës për Korporatë Energjetike të Kosovës, Skender Bucolli tha se gjendja e tyre është stabile, derisa deklaroi se kjo valë e infektimeve ka ndikuar në ndryshimin e orarit nga tri në dy ndërrime.
Po ashtu Bucolli shtoj se nga kjo valë e infektimeve janë testuar edhe 43 punonjës të dyshuar, të cilët kanë pasur kontakte me kolegët që kanë rezultuar pozitiv me koronavirus, rezultatet e të cilëve priten të dalin sot.
Gjithashtu se Bucolli theksoi se nuk ka ngecje në energjinë elektrike pasi që stafi i prekur janë punonjës të mirëmbajtjes.
“Ne nuk kemi ndonjë ngecje në operim, stafi është më shumë i mirëmbajtjes, kemi marrë masa shtesë edhe në ndryshimin e orareve që nga tri ndërrime në dy ndërrime. Nga sot do të punohet me dy ndërrime nga 12 orë”.
Drejtori i Zyrës për Korporatë Energjetike të Kosovës bën apel edhe një herë tek të gjithë punëtorët që të jenë vigjilent kudo që ndodhen në respektimin e rekomandimeve të IKSHKP-së, duke mbajtur distancën sociale dhe gjithashtu përdorimin e pajisjeve të nevojshme higjienike. Veprime këto të domosdoshme për të parandaluar përhapjen e pandemisë. /InLajmi/
