Dyshja sulmuese e Ballkanit, Blend Baftiu e Arbër Hoxha, të cilët janë ftuar për herë të parë nga përzgjedhësi i Kombëtares, Bernard Challandes për ndeshjen miqësore kundër Suedisë, më 12 janar në Doha, janë shprehur të lumtur që iu ka dhënë mundësia për t’i treguar vlerat e tyre para trajnerit zviceran.
Që të dy shpresojnë se ky do të jetë hapi i parë drejt realizimit të ëndrrës së tyre për të qenë pjesë e Dardanëve edhe në ndeshjet kualifikuese në të ardhmen. “Është një ndjenjë e veçantë dhe e papërshkrueshme, por njëherësh edhe përgjegjësi të jesh pjesë e Kombëtares A. Është hera e parë për mua që kam marrë ftesë nga përzgjedhësi Challandes dhe po ndjehem shumë mirë në mesin e bashkëlojtarëve”, ka thënë Baftiu. Ai ka vlerësuar si tejet pozitive ecurinë e stërvitjeve në Doha, derisa ka shprehur shpresën për një paraqitje të mirë kundër Suedisë. “Të gjithë lojtarët janë të motivuar dhe angazhimi i secilit në stërvitje është maksimal. Për këtë arsye pres që të kemi një prezantim sa më të mirë në ndeshjen e së dielës. Normalisht që ëndërr dhe synim i imi është që edhe në të ardhmen të jem pjesë e Kombëtares A”, ka thënë Baftiu, shkruan RTK.
Ndërkaq, Arbër Hoxha, ka shprehur falënderim për përzgjedhësin Challandes që e ka ftuar në këtë miqësore. “Të jesh pjesë e Kombëtares A është një ndjenjë e papërshkrueshme dhe shpresoj që të jap më të mirën time nëse më jepet rasti të paraqitem kundër Suedisë. Mua më mbetet të vazhdoj të punoj maksimalisht dhe pse jo në të ardhmen të luaj edhe në ndeshje kualifikuese. Kushtet për stërvitje këtu janë shumë të mira dhe kjo po na jep mundësi për t’i treguar cilësitë tona para përzgjedhësit. Sigurisht se ndeshja kundër Suedisë do të jetë shumë e vështirë, duke pasur parasysh se në radhët e veta kanë futbollistë cilësor, por ne shpresojmë që do të paraqitemi denjësisht dhe ta fitojmë këtë ndeshje”, ka theksuar Hoxha. Kombëtarja e Kosovës do të përballet të dielën me Suedinë, në Doha, në orën 15:45, ndeshje kjo e cila do të transmetohet ekskluzivisht në RTK.
