Profesori universitar, Milazim Krasniqi, ka thënë se “vijat e kuqe” janë shndërruar në gardhiqe, për LVV dhe nuk e di a e ka kuptuar ajo.
Krasniqi përmes një shkrimi në rrjetin social Facebook ka thënë se këto vija po e mbajnë të bllokuar shtetin tash e tre muaj dhe se Kurti ka thënë se nuk do të ketë vija të kuqe ndaj Listës Serbe ndërsa që po ka vija të kuqe ndaj një partie shqiptare.
“Politika e LVV po i ngjet bumerangut, që bën një fluturim, ama prapë kthehet në vendin nga ku hidhet. LVV duhet të zëvendësojë lojën bumerang me lojën pidpidak. Nëse nuk e bën, fitorja e 6 tetorit 2019 mund t’i përplaset për fytyrë, si humbje”, theksoi Krasniqi.
Postimi i tij i plotë në Facebook:
BUMERANGU DHE PIDPIDAKU
Nuk e di a e kanë kuptuar ende në LVV se të ashtuquajturat “vijat e kuqe”, janë shndërruar në gardhiqe, për vetë LVV. Këto gardhiqe po e mbajnë të bllokuar edhe shtetin tash tre muaj. Kurti ka njoftuar se nuk do të mbahen vijat e kuqe me Listën Serpska, që komandohet direkt nga Vuçiqi, ndërsa po mban ende vijat e kuqe me parti legale shqiptare, që kanë kontribute reale në ndërtimin e shtetit. Po të mos ishin ato vija, Kurti nuk do të mbahej peng, siç po mbahet. Politika e LVV po i ngjet bumerangut, që bën një fluturim, ama prapë kthehet në vendin nga ku hidhet. LVV duhet të zëvendësojë lojën bumerang me lojën pidpidak. Nëse nuk e bën, fitorja e 6 tetorit 2019 mund t’i përplaset për fytyrë, si humbje.