Me radhë të gjata ka nisur edhe mëngjesi i së hënës në pikën kufitare të Merdarit.
Derisa mërgimtarët të dielën u përballën me pritje 9-orëshe për të dalë nga Kosova, këto pritje megjithatë, kanë qenë më të shkurtra të hënën gjatë ditës.
Pritjet për të kaluar nëpër këtë pikë sot kanë shkuar deri në 4 orë.
Për qytetarë që zgjodhën këtë pikë kufitare, vazhdon të mbetet problem pritja me orë të tëra këtu.
Ata fajësojnë policinë kufitare serbe për vonesat, si shkak i mos-hapjes së sporteleve të tjera për të përshpejtuar procesin derisa përballen me të njëjtën ngjarje çdo vit.
Gjatë ditës, Ministria për Punë të Jashtme e Kosovës ka lëshuar një komunikatë në të cilën ka porositur qytetarët e vendit që të evitojnë kalimin nëpërmjet Serbisë.
Aty vlerësohet se Serbia nuk është më territor që ofron siguri minimale për integritetin fizik dhe juridik të qytetarëve.
Sipas MPJ-së, veprimet e vazhdueshme të autoriteteve serbe, sidomos ato kur arrestojnë e paraburgosin qytetarë kosovarë, dëshmojnë për qasjen destruktive të Serbisë.
“Duke ri-kujtuar komunikatën e 31 majit 2019, njoftojmë qytetarët e Republikës së Kosovës, me vendbanim në Kosovë apo jashtë vendit, që të shfaqin kujdes dhe maturi në rast se nuk mund të shmangin qarkullimin nëpër territorin e Serbisë. Në përputhje me obligimin institucional dhe ligjor për të informuar publikun dhe për t’u kujdesur për sigurinë dhe integritetin e secilit qytetar të Kosovës, Ministria e Punëve të Jashtme vlerëson se Serbia është më një territor i cili nuk ofron as siguri minimale për integritetin e tyre fizik dhe juridik, dhe as për familjarët e tyre. Për rrjedhojë, sugjerohet evitimi i përkohshëm i qarkullimit përmes këtij vendi”, ka thënë MPJ-ja, shkruan Koha.net.
Me pritje të gjata gjatë së hënës janë shoqëruar edhe bashkatdhetarët që kanë shfrytëzuar pikat e tjera kufitare në Jarinjë e Mutivodë, ku pritjet për të dalë nga Kosova kanë shkuar mbi një orë.