Shpend Ahmeti sot ka dhënë dorëheqje nga posti i kryetarit të partisë Social Demokrate. Sot kjo parti është duke mbajtur Kuvendin zgjedhor, ku do të zgjidhet kryetari dhe kryesia e partisë.
Burime brenda PSD-së mëson se kandidat për kryetar të kësaj partie është Dardan Molliqaj.
Ndërkaq, Shpend Ahmeti dorëheqjen e tij nga strukturat e partisë e ka bërë të ditur sot përmes një statusi në Facebook.
Ai ka thënë se fajin për dështimin e PSD’së në zgjedhjet e 6 tetorit e ka ai si kryeta, shkruan Gazeta Express.
“Natyrisht se përgjegjësia më e madhe është e imja si kryetar i subjektit. Për të mos kërkuar përgjegjësi nga asnjëri individualisht, si kryetar i subjektit kam kërkuar mbledhjen e Kuvendit të PSD si organ më i lartë vendimmarrës në subjekt. Meqenëse edhe Statuti i PSD kërkon mbajtjen e zgjedhjeve pas zgjedhjeve nacionale për Kuvendin e Kosovës, sot kam kërkuar nga Kuvendi i PSD mbajtjen e zgjedhjeve të jashtëzakonshme për të gjitha strukturat udhëheqëse të partisë duke filluar nga kryetari. Kjo na mundëson që kolektivisht të reflektojmë dhe të marrim përgjegjësi si parti. Ky propozim u aprovua në mënyrë unanime dhe që nga sot PSD do të ketë kryetar të ri dhe Këshill të ri. Pastaj Këshilli do ta votojë kryesinë e re dhe pozitat tjera udhëheqëse në parti”, ka shkruar Ahmeti në statusin e tij ku ka bërë të ditur dorëheqjen.
