Pas shpalljes së rezultatit përfundimtar të zgjedhjeve nga KQZ, Nisma Socialdemokrate ka mbajtur një konferencë për medie .
Endrit Shala i Nismës ka thënë se sot KQZ nuk shpalli rezultate nga votat e rregullta dhe sipas ligjit për zgjedhje por në fakt KQZ sot shpalli rezultate të fabrikuara e të prodhuar nga ajo vet.
Shala ka shtuar se rezultati i rregullt, pa votat e ardhura nga Serbia, është ai që e fut këtë subjekt në Kuvend.
Duke u nisur nga kjo, Shala ka thënë se Nisma është mbi 5 %.
“Rezultati përfundimtar është ai që ka dalë nga votat e rregullta, dhe nga votat e parregullta, koalicioni jonë është mbi 5 %. Do t’i shfrytëzojmë të gjitha instancat për ankimimin tonë për zbatimin e ligjit, ligj që është i obliguar për të gjithë qytetarët. Nisma do t’i dërgojë në të gjitha institucionet e parapara me ligjet në fuqi që të respektohet ligji”, ka thënë ai.
Shala në këtë konferencë me vete ka pasur disa dokumente në të cilat ai thotë se janë ankesat me të gjitha provat që do të dërgohen në të gjithë institucionet, duke mos përjashtuar as Gjykatën Kushtetuese. /InLajmi