Ministri në detyrë i Drejtësisë, Abelard Tahiri, ka njoftuar se ekstradimi i Mario Miloseviç është realizuar me sukses.
Ai ishte i kërkuar nga autoritetet malazeze i cili dyshohet për vrasje të rëndë dhe mbajtje të paautorizuar të materialeve plasëse.
“Falë punës që kemi bërë si Ministri e Drejtësisë në rrafshin e bashkëpunimit juridik ndërkombëtar, sot më datë 5 nëntor 2019, është realizuar me sukses ekstradimi i njërit nga personat më të kërkuar nga Mali i Zi, i dyshuari Mario Miloseviç, shtetas i Republikës së Malit të Zi”, thuhet në deklaratën e Tahirit dërguar medieve.
Sipas njoftimit, Tahiri ka thënë tutje se nga shtatori i 2017 deri në nëntor 2019, janë përmbyllur 165 ekstradime, e që sipas tij e bënë Kosovën një vend primar kundër krimit ndërkombëtar .
“Bashkëpunimi i Ministrisë së Drejtësisë dhe organeve të pavarura të sundimit të ligjit si dhe përkushtimi për të vendosur para përgjegjësisë secilin person të dyshuar, e ka bërë Kosovën një vend primar në luftën kundër krimit ndërkombëtar dhe një vend të pasigurt për kriminelët. Në saje të përkushtimit në luftën ndaj krimit trans-nacional, që nga shtatori i vitit 2017 deri më nëntor 2019, janë përmbyllur 165 ekstradime, më shumë se sa kanë ndodhur për vite të tëra marrë së bashku”, thuhet tutje në njoftim./InLajmi/