Lëvizja Vetëvendosje ka komentuar konstatimet e raportit të Institutit të Mjekësisë Ligjore në Zvicër, ku sipas familjarëve dhe avokatit Tomë Gashi, u tha se Astrit Dehari është vrarë, shkruan InLajmi.
Vetëvendosje ka shkruar se shkaku i vrasjes së Astrit Deharit është që ka qenë aktivistit i saj, duke kërkuar që të fillojnë hetimet sa më parë, të pavarura, të drejta dhe profesionale.
Njoftimi i plotë:
Astrit Dehari është vrarë për shkak se ka qenë aktivist i Lëvizjes VETËVENDOSJE!
Këtë e ka thënë edhe raporti i ekspertëve të mjekësisë ligjore nga Shqipëria e Mbretëria e Bashkuar, këtë e thotë tani edhe raporti i ekspertëve të Qendrës Universitare Romande për Mjekësi Ligjore (CURML) në Lozanë të Zvicrës, këtë e ka thënë vetë trupi i Astrit Deharit.
Prokuroria e ka obligim ligjor dhe njerëzor që t’i fillojë hetimet për rastin, në mënyrë që përgjegjësit e këtij krimi monstruoz, që e privoi aktivistin 26 vjeçar Astrit Deharin nga jeta, të vihen të gjithë para drejtësisë. Drejtësia nuk duhet të ndalet para fajtorëve, sado lart që mund të ndodhen ata në hierarkinë e pushtetit. Po ashtu, duhen hetuar edhe ata që përkundër dhimbjes së familjes, shokëve dhe mbarë opinionit publik, u bënë mjet i dezinformimit menjëherë pas vrasjes së Astritit në burg. Cili ishte qëllimi i atyre që me çdo mjet, edhe duke gënjyer e duke i ndërruar fjalët, donin ta mbulonin krimin si vetëvrasje?/InLajmi/
