Subjekti i drejtuar nga Albin Kurti ka dalur me një komunikatë sot pasi është mbajtur takimi i dytë në mes të grupeve punuese të LDK-së dhe Vetëvendosjes.
Ky subjekt ka bërë të ditur se në vijim të koordinimit për të arritur në marrëveshjen finale të qeverisjes u takuan grupet punuese të Lëvizjes Vetëvendosje, përbërë nga nënkryetari Besnik Bislimi, anëtarët e kryesisë Glauk Konjufca e Albulena Haxhiu dhe Lidhjes Demokratike të Kosovës përbërë nga Avdullah Hoti dhe Lumir Abdixhiku.
“Takimi i mbajtur në selinë qendrore të Lëvizjes Vetëvendosje është i dyti në radhë, pas atij të mbajtur më 18 tetor. Ky takim do të pasohet nga takime të tjera gjatë dy javevë të ardhshme. Synimi i takimi është përafrimi programor në çështjet e zhvillimit ekonomik, shtetit të së drejtës dhe rendit, arsimit, shëndetësisë, politikave sociale dhe politikës së jashtme”, thuhet në njoftimin e VV-së, shkruan rtk.
Gjithashtu, është njoftuar se takimi i radhës do të mbahet të hënën më 28 tetor, në orën 15:00 në zyrën e Lidhjes Demokratike të Kosovës.