Prokuroria Themelore në Prishtinë ka nisur hetimet ndaj biznismenit Ramiz Kelmendi pas deklaratave të tij në një televizion, ku tha se votat e punëtorëve të tij do të shkojnë për Partinë Demokratike të Kosovës.
Lajmin për këtë e ka bërë të ditur Prokuroria përmes një komunikate drejtuar mediave.
“Prokuroria Themelore në Prishtinë, njofton opinion se, pas deklaratave publike të biznesmenit, R.K., i cili është duke kërkuar votën nga të punësuarit në kompaninë e tij, me qëllim të favorizimit dhe votimit për njërën nga partitë politike të Kosovës, ka ndërmarrë veprime përkatëse hetimore, duke e iniciuar si rast paraprak penal, lidhur me veprën penale “Cenimi i paracaktimit të lirë të votuesve” nga neni 210 të KPK-së”, thuhet në komunikatë.
Kelemendi kishte deklaruar se është duke lobuar për partinë e Veselit dhe se po kërkon vota për të.
“Unë në të gjithë kohën dhe ne të kaluarën për të treguar për votën që e sjelli në parti dal dhe e kërkoj vullnetarisht atë, edhe tash shkoj vet edhe te biznesët edhe te të punësuarit e mij për të kërkuar vota për PDK”, kishte deklaruar ai, shkruan Insajderi
Tutje ai kishte treguar se është hera e katër që kërkon vota nga punëtorët e tij, ndërsa hera e parë që nuk kërkon për vete.
Eshtë hera e parë që kërkojë votë prej punëtorëve të mij, të gjitha ato do të shkojnë për PDK’në”, kishte thënë Kelmendi.
Ndryshe, Kelmendi para disa javëve kishte njoftuar dorëheqjen nga Lidhja Demokratike e Kosovës, pasi që kjo parti nuk e kishte miratuar kërkesën e tij që të emërohet si zëvendës ministër i Ekonomisë, në rast se LDK-ja do t’i fitonte zgjedhjet e 6 tetorit.
Pas kësaj ai kishte dalur zyrtarisht në mbështetje të Partisë Demokratike të Kosovës dhe kryetarit të këtij subjekti, Kadri Veseli.
