Kadri Veseli, kandidat i PDK-së për kryeministër në zgjedhjet e 6 tetorit, ka startuar me fushatën elektorale në Mitrovicë
Ai ka thënë se Mitrovica është vendnisja e fushatës zgjedhore për të përcjell mesazhin se Kosova është mirë, atëherë kur është mirë edhe Mitrovica.
“Në Mitrovicë, në vendin që më frymëzoi dhe ku nisa rrugëtimin tim jetësor, e nisa edhe këtë rrugëtim të ri të Kosovës, për fitoren e madhe të Partisë Demokratike të Kosovës. E zgjodha Mitrovicën për ta përcjellë qartë dhe fuqishëm mesazhin e Kosovës dhe të Partisë Demokratike: se Kosova është mirë vetëm kur Mitrovica është mire”.
Veseli më tutje tha se fitorja i takon vetëm Partisë Demokratike të Kosovës e cila do të fuqizoj marrëdhëniet me Shtetet e Bashkuara. Po ashtu përmendi edhe rëndësinë e anëtarësimit në OKB-në.
“Të gjithë ne duhet të bëhemi bashkë si dikur, si atëherë kur rrezikoheshim dhe të vendosim me tërë fuqinë për t’a bërë Kosovën shtet të cilin e kemi ëndërruar. Ne mundemi dhe ne do ta bëjmë këtë. Do ta bëjmë, sepse tokë tjetër për të jetuar nuk kemi. Për këtë, ne kemi guximin e duhur dhe vizionin e qëlluar.
Kosova duhet ta bëjë një zgjedhje: me Shtetet e Bashkuara të Amerikës, në krahun tonë, duke ruajtur interesat tona, të shkojmë drejt anëtarësimit në OKB dhe njohjes ndërkombëtare.
Kushdo që beson në këtë të ardhme, le të na bashkohet. Së bashku, mundemi. Së bashku, do të fitojmë. Më 6 tetor, votojeni Partinë Demokratike të Kosovës. Kur fitojmë ne, fiton Kosova” tha Veseli, raporton/InLajmi/
