Shumë prej jush e mbajnë historinë e Yamato Tanooka-s, vogëlushit 7-vjeçar japonez, e cila u bë virale korrikun e këtij viti kudo në botë. Prindërit vendosën t’i jepnin një mësim duke e ‘’braktisur’’ për pak minuta në një pyll në mënyrë që ai të refektonte për gabimin e bërë. Por surpiza e vërtetë ndodhi kur djali vendosi të ‘’hakmerrej’’ dhe u largua afro 7 kilometra nga vendi ku e lanë ata.
Kjo histori, aq sa e largët gjeografikisht, është e pranishme edhe në realitetin tonë. Si dhe ngre shumë pikëpyetje rreth ndëshkimit si formë edukimi për fëmijët. Psikologët e zhvillimit theksojnë që ndëshkimi, qoftë fizik apo simbolik, pengon rritjen, zhvillimin e përgjegjësisë dhe autonominë e fëmijës.
Rritja e shëndetshme e fëmijëve nënkupton para së gjithash të njohësh fazat e zhvillimit të tyre dhe të pranosh nevojat që kanë. Nuk ka rregulla të arta për të qenë prindër të mirë, por përpara se të ndëshkoni fëmijët tuaj ndiqni këto këshilla dashamirëse.
- Përshatuni me moshën e fëmijëve: Mos harroni që fëmijët tuaj nuk janë kopjet tuaja. Ato janë individë të mëvetësishëm, por me dëshirat dhe nevoja konkrete. Prandaj merrni parasysh moshën e tyre sa herë vendosni diçka për ta.
- Qartësia e rregullave: Në çdo familje ekzistojnë rregulla të shkruara e të pashkruara që ndihmojnë marrëdhënien mes pjesëtarëve. Duhet të përcaktoni që në krye të herës këto rregulla në mënyrë që të mos ketë vend për keqkuptime. Kështu krijoni më shumë besim dhe stabilitet emotiv. Rregullat vendosen dhe miratohen nga të gjithë.
- Jepuni kohë: Nuk është e thjeshtë për prindërit të krijojnë një lidhje të menjëhershme me fëmijët pas një përplasjeje. Të dyja palët kanë nevojë për kohë në mënyrë që të reflektojnë. Respektoni kohën dhe hapësirën që i duhet gjithkujt në momente të tilla.
- Si të sillesh me adoleshentët: Shpeshherë dëgjojmë të thuhet se adoleshentët fikin trurin sa herë që debatojnë me prindërit. Kjo ndodh sepse në rastin e një debati verbal rritet reagimi i tyre emotive dhe ulet kapaciteti konjitiv. Çfarë duhet të bëni ? Nuk duhet t’i kundërviheni këtij procesi, por ta mbështesni atë. Mos dënoni gabimet që mund të bëjnë, por ndihmoni fëmijët tuaj t’i jetojnë këto momente si eksperienca të rritjes.
- Thuajini jo ‘’time out: Time out është një teknikë e cila nënkupton izolimin e fëmijëve nga shumë aktivitete. Shumë fëmijë nuk reagojnë mire kur ju nuk i bëni të ndihen pjesë e familjes apo i privoni nga lojërat në grup. Kjo gjë konsiderohet si një poshtërim. Si dhe rrit inatin e agresivitetin e tyre.