Presidenti i Republika Sërpskas në BeH, Millorad Dodik, përsëriti kërcënimin e tij për t’u shkëputur nga vendi të mërkurën, një ditë përpara një votimi të planifikuar në OKB.
Rezoluta e propozuar e OKB-së e sponsorizuar nga Gjermania dhe Ruanda, ka ngjallur protesta dhe një fushatë të fortë lobimi kundër këtij veprimi nga Dodiku, dhe nga presidenti populist i Serbisë fqinje, Aleksandar Vuçiq, shkruan AP.
Të 2 drejtuesit thonë se rezoluta do t’i markonte të gjithë serbët si gjenocidalë, megjithëse drafti nuk i përmend në mënyrë të qartë serbët si fajtorë.
Asambleja e Përgjithshme e OKB-së ka planifikuar një debat mbi rezolutën të enjten në mëngjes për t’u pasuar me një votim në organin botëror të 193 anëtarëve. Serbët kanë mbështetjen e aleatëve të tyre Rusia dhe Kina, ndërsa rezoluta mbështetet nga SHBA dhe shumica e shteteve të tjera perëndimore.
Dodiku, i cili është president i Republika Sërpskas, i cili përfshin rreth gjysmën e Bosnjës, tha në platformën e mediave sociale X se rezoluta e ShBA-së po shtyhet në Bosnje nga mbështetësit e boshnjakëve myslimanë dhe se do ta ndajë vendin.
“Bosnja dhe Hercegovina kanë arritur fundin e saj, ose për të qenë më i saktë, ajo mori fund nga ata që u betuan për të”, tha Dodiku në X. “Krejt çka mbetet është që të gjithë ne të bëjmë një përpjekje për të qenë fqinjë të mirë dhe për të ndahemi në paqe”.
Ndërkaq, për radiotelevizionin e Republika Sërpskas (RTRS), Dodiku tha se qysh nesër në një seancë të qeverisë në Srebrenicë do t’ia paraqesë palës federale propozimin për ndarje.
“Se a do të përshpejtohet e gjithë kjo ose do të marrë kohë, është çështje procesi. Ne zgjedhim një ndarje paqësore dhe këtë do ta propozojmë që nesër në seancën e qeverisë në Srebrenicë. Do t’ia propozojmë palës federale”, tha Dodiku për RTRS.
Dodiku ka bërë disa kërcënime të tilla në të kaluarën që territoret e kontrolluara nga serbët të shkëputen nga Bosnja dhe të bashkohen me Serbinë fqinje. Ai dhe disa zyrtarë të tjerë të serbëve boshnjakë janë nën sanksione amerikane dhe britanike pjesërisht për rrezikimin e një plani amerikan të paqes që i dha fund luftës së Bosnjës 1992-95.
Vuçiqi dhe Dodiku, të 2 politikanë pro-rusë, kanë argumentuar kundër rezolutës duke ngritur mundësinë që ajo të hapë derën për të pasur nevojë për të paguar dëmet e luftës nëse miratohet.
Draft rezoluta dënon “pa rezervë çdo mohim të gjenocidit të Srebrenicës si një ngjarje historike”. Ajo gjithashtu “dënon pa rezervë veprimet që lavdërojnë të dënuarit për krime lufte, krime kundër njerëzimit dhe gjenocid nga gjykatat ndërkombëtare, përfshirë ata që janë përgjegjës për gjenocidin e Srebrenicës”.
Udhëheqësi politik serb i Bosnjës në kohë të luftës, Radovan Karaxhiq dhe komandanti i tij ushtarak, Ratko Mlladiq, u dënuan të 2 për gjenocid në Srebrenicë nga një gjykatë speciale e krimeve të luftës në OKB në Hagë, Holandë. Në përgjithësi, Tribunali dhe gjykatat në Ballkan kanë dënuar afër 50 zyrtarë serbë të Bosnjës të kohës së luftës me dënime të ndryshme me burg.
Qeveria e Serbisë vazhdon të mohojë që në Srebrenicë ishte kryer gjenocid, megjithëse e quan atë një “krim të tmerrshëm”, transmeton Klankosova.tv
Më 11 korrik 1995, serbët boshnjakë kaluan një zonë të sigurt të mbrojtur nga OKB-ja në Srebrenicë. Ata ndanë të paktën 8,000 burra dhe djem myslimanë të Bosnjës nga gratë e tyre, nënat dhe motrat dhe i masakruan. Ata që u përpoqën të shpëtonin u ndoqën nëpër pyje dhe mbi malet përreth qytetit.
