Kryetari i Degës së LDK-së në Ferizaj, Visar Azemi, ka shpalosur disa të dhëna të tjera, derisa ka një debat në distancë që zhvillohet në mes të kësaj partie dhe qeverisë e zyrtarëve të Vetëvendosjes.
Azemi duke thënë se Lëvizjen Vetëvendosjen po e pengojnë faktet që ata po shpalosin, ka treguar se numri i kontratave njëburimore që ka arritur qeveria ka shkuar në 788 sosh, transmeton KlanKosova.
“Ne e dimë pse po ju acarojnë faktet tona. Sepse për 5 ditë pune, keni dhënë së fundi 7 tenderë të negociuar. Mbi 4 milionë euro të tjera i keni dhënë në tavolinë. Pra, keni mbërri në shifrën e 788 kontratave njëburimore apo në vlerën e 213 milionë eurove të dhëna sy me sy”,ka thënë Azemi duke kërkuar e pyetur se pse shumica po e kundërshton themelimin e komisionit hetimor parlamentar për kontratat njëburimore.
Më tej ai duke ju referuar të dhënave nga Thesari i Shtetit, ka folur për investimet kapitale që ka bërë Ministria e Financave dhe Transfereve.
“Është pikërisht Ministria e këtij të fundit, ajo e Financave, Punës dhe Transfereve, që shkallën e realizimit të investimeve kapitale gjatë vitit 2023 e ka veç 52%. Pra, pakëz më shumë se gjysma, e që janë veç 8.3 milionë euro”.
“Meqë Murati preferon krahasimin e ministrive me komuna, le të qëndrojmë pak edhe këtu. Një ministri, ajo e Ekonomisë ka realizuar veç 11% të investimeve kapitale vitin që shkoi. Në përqindje, ministria e Artane Rizvanollit është me keq se shumica e komunave të Kosovës. Me keq se ky dikaster i qeverisë është veç Zveçani, Zubin Potoku e Leposaviqi”.
