Formula 1 ka ndezur zyrtarisht motorët për Botërorin 2024, teksa janë zhvilluar 2 sesionet e provave të lira të vlefshme për Çmimin e Madh të Bahrejnit. Dita e parë në Sakhir u mbyll nën shenjën e Mercedesit, teksa ishte Luis Hamilton ai që fiksoi rezultatin më të mirë. Piloti britanik regjistroi kohën më të shpejtë në sesionin e 2-të, duke e ndalur kronometrin në 1:30.374, për të lënë pas shokun e skuadrës, Xhorxh Rasëll (+0.206).
Fernando Alonso konfirmoi bazën e mirë startuese të makinës Aston Martin duke plotësuar podiumin virtual me 286 të mijta nga kreu përpara pilotit të Ferrarit, Karlos Sainz, i 4-erti, me 395 të mijtë pas britanikut që do ta zëvendësojë në sezonin e ardhshëm te “kokëkuqja”.
Një hap mbrapa për MekLarenin, me vendin e pestë të Oskar Piastrit, ndërsa Maks Vershtapen ende nuk i ka zbuluar “kartat” e tij, duke e mbyllur sesionin e 2-të të provave në vend të 6-te me 477 të mijtat larg kreut.
Niko Hulkenberg i skuadrës Haas dhe Lans Stroll me njëvendëshen e tij Aston Martin bënë një hap të mirë përpara, duke i paraprirë pilotit tjetër të Ferrarit, Sharles Lëklerk. Monegasku (+0,739) nuk shkoi më shumë se vendi i nëntë, ndërsa Red Bulli tjetër, i drejtuar nga Serxho Perez kompleton dhjetëshen e parë të renditjes në provat e lira 2, shkruan alsat.mk
Ndërkohë Çmimi i Madh i Bahrejnit, që do të ngrejë edhe siparin e Botërorit 2024 do të ndezë semaforët jeshilë të shtunën në orën 16:00.
