Një shpërthim me bombë ka ndodhur pranë godinës së ministrisë së Punës në Athinë, raportojnë mediat greke. Shpërthimi shkaktoi dëme të konsiderueshme materiale, ndërsa theu xhamat si në ministrinë e Punës, që ndodhet përballë vendit të shpërthimit, ashtu edhe në objektet e tjera pranë.
Shpërthimit i kanë paraprirë 2 telefonata nga persona të panjohur të cilët kanë paralajmëruar për bombën. Fillimisht ata thanë se bomba ishte vendosur në Ministrinë e Punës dhe më vonë në telefonatën e radhës thanë se bomba ishte në filialin e një banke, e cila ndodhet përballë ministrisë.
Sipas policisë, bomba e cila ishte vendosur në një çantë shpine, ka shpërthyer në orën 01:29. Raportohet se pas kësaj ngjarjeje qëndron organizata “Vetëmbrojtja e Klasës Revolucionare”, e cila, sipas mediave, është e panjohur më parë, shkruan FrontOnline.
“Sot në orën 00:48 Qendra e Veprimit të Menjëhershëm është njoftuar përmes telefonit nga Gazeta e Redaktorëve se kanë marrë një telefonatë në lidhje me vendosjen e një lënde shpërthyese në Ministrinë e Punës, e cila do të shpërthente në 40 minuta. Zona është rrethuar nga forcat e policisë të cilat kanë shkuar menjëherë në vendngjarje, duke devijuar trafikun. Mekanizmi ka shpërthyer në orën 01:29, duke shkaktuar dëme materiale. Një hetim paraprak po kryhet nga Shërbimi Antiterrorist”, tha policia.
