Kancelarja gjermane, Angela Merkel do të shkojë në Rusi për të takuar Presidentin Vladimir Putin të shtunën e kësaj jave ku do të diskutojnë për përshkallëzimin e situatës në Iran si dhe për konfliktet në Ukrainë, Libi dhe Siri.
Presidenti rus Vladimir Putin e ftoi kancelaren gjermane Angela Merkel në Rusi fundjavën e ardhshme, për të diskutuar rritjen e tensioneve në Lindjen e Mesme pas vrasjes së gjeneralit iranian Qassem Soleiamani.
Kremlini konfirmoi se takimi është caktuar të zhvillohet në 11 janar, por nuk deklaroi se ku do të zhvillohej. Në takim do të marrë pjesë edhe ministri i Jashtëm gjerman Heiko Maas.
Si anëtare e përhershme e Këshillit të Sigurimit të OKB, Rusia është “e domosdoshme” kur bëhet fjalë për zgjidhjen e konflikteve politike, tha zëdhënësi i qeverisë gjermane Steffen Seibert.
Përveç krizës së Lindjes së Mesme, konfliktet në Siri dhe në Libi, ku Turqia sapo ka nisur të vendosë trupa, do të jenë gjithashtu në agjendë. Rusia tha se do të mbështesë nismën e paqes të Gjermanisë në rajon.
Mendohet që të dy liderët mund të diskutojnë situatën e Ukrainës, duke vazhduar që nga aneksimi rus i Krimesë në 2014.
