Filharmonia e Kosovës në bashkëpunim me Teatrin Kombëtar të Operës dhe Baletit të Shqipërisë, mbrëmë në Prishtinë sollën operën solemne “Gjergj Kastrioti – Skënderbeu, kryezot i Arbërit” nga Vasil S. Tole me libreto të vet kompozitorit mbi tekstin e Fan S. Nolit, përcjell InLajmi.
Solistët, tenori Klodjan Kaçani, baritoni Artur Vera, soprano Kaltrina Miftari, mezosoprano Dea Xhemaili e tenori Rizah Jahaj, dhuruan emocione të forta për publikun duke interpretuar historinë shqiptare përmes kësaj forme të bukur arti.
Nga Ministria e Kulturës thonë se kjo operë i ka tejkaluar pritshmëritë e publikut.
Shoqëruar nga Orkestra dhe Kori i Filharmonisë së Kosovës, nën drejtimin e Sieva Borzak dhe Hajrullah Syla në bashkëpunim me Korin e TKOB-së, drejtuar nga Dritan Lumshi dhe me konceptin regjisorial të Ada Gurrës, kjo premierë shënon projektin e 5 të bashkëpunimit me Shqipërinë për këtë sezon koncertal. /InLajmi/
