Qytetarët e Kosovës vazhdojnë të mos paguajnë për qeset e plastikës. Ministria e Ambientit kishte paralajmëruar se një vendim i tillë do të hynte në fuqi në fillim të këtij viti, por ky udhëzim administrativ është shtyrë për plotësim. Ekspertë të ambientit thonë se një milion kilogram qese apo thasë plastike shiten në tregun e Kosovës.
Ndonëse Ministria e Mjedisit, kishte paralajmëruar se nga janari i vitit 2023, qytetarët e Kosovës do të paguajnë për qeset plastike, një gjë e tillë nuk ka ndodhur ende. Në një përgjigje dhënë Radio Kosovës, nga kjo ministri thonë se në dhjetor të vitit që lëmë pas, ka përfunduar Udhëzimi Administrativ për Ambalazh dhe Mbeturinat e Ambalazhit, mirëpo është shtyre për miratim.
“Ky Udhëzim Administrativ, nuk rregullon vetëm çështjen e qeseve të plastikës por edhe sistemin e rimbursimit të depozitave për shishet (qelq, kanaqe dhe plastikë) dhe tek kjo pjesë jemi duke i plotësuar disa çështje për rregullimin e këtij sistemi, prandaj jemi detyruar që ta shtyjmë miratimin e këtij udhëzimi, deri sa të rregullojmë këtë pjesë. Me ndryshimet e bëra udhëzimi administrativ duhet edhe njëherë të dal në diskutim publik e pastaj të shkoj në mbledhje të qeverisë për miratim”, thuhet në përgjigjen më shkrim nga Ministria e Mjedisit.
Këtë iniciativë të ministrisë po e përkrahin edhe organizatat të cilat merren me ambientin. Adnan Elshani, ekspert për ambient në “Environment Hub”, tha se dëmi që shkaktojnë qeset e plastikes është i shumëfishtë dhe nuk ka arsye që ato më të ekzistojnë në treg.
“Vërehet një rritje simbolike e vetëdijes së qytetarëve në bazë të raportit të mjedisit të 2021 që ka një rënie të përdorimit të tyre në 10%. Mirëpo prapë një milion kilogram qese apo thasë plastike shiten në tregun e Kosovës. Duhet sa më shpejt të dilet me procedura e të ndalohen rreptësisht”, tha Elshani.
E një shitës në një market në Prishtinë, tha se me dëshirë do t’i shiste këto qese për arsye të ndryshme. Por ende ai vazhdon t’i japë falas.
“Ende nuk kemi filluar t’i shesim por posa të shohim se është marrë vendim nga kompetentët, do të fillojmë të bëjmë shitjen e tyre”, shkruan RTK.
Qeset e plastikes në shumicën e shteteve evropiane janë me pagesë ose janë jashtë përdorimit. Po ashtu, nga një qershori, përdorimi i qeseve plastike edhe në Shqipëri është bërë me pagesë.
