Para 2 muajve qytetarët kanë protestuar para qeverisë për tërheqjen e 30% të mjeteve të Trustit.
Sipas tyre është e nevojshme tërheqja e atyre mjeteve për shkak të krizës që ka kapluar vendin. Në mesin e tyre ishte edhe inicuesi i kësaj nisme, deputeti i PDK-së, Bekim Haxhiu.
Haxhiu kishte akuzuar kryetarin e Komisionit për Buxhet dhe Financa, Armend Muja, se po e pengon kalimin e Trustit nga Komisioni për votim në Kuvend.
PDK ka kërkuar që Projektligji për tërheqjen e 30%-shit të kalojë sa më parë në Kuvend. Kësaj radhe, ky projektligj do të jetë në formën e iniciativës qytetare dhe jo politike, siç ishte herën e parë.
E në lidhje me këtë çështje, qëndrimi i partisë në pushtet, Vetëvendosje vazhdon të jetë i njëjtë. Partia e Kurtit kundërshton fuqishëm këtë nismë.
Këtë e konfirmon edhe shefja e Grupit Parlamentar të VV-së, Mimoza Kusari – Lila.
“Është qëndrim që diskutohet në grup, ne kemi deklaruar dhe kemi prezantuar qëndrimin edhe në kuvend, kështu që mbetet i njëjti”, tha Kusari.
E pyetur se a do të ketë lëvizje të qëndrimit, ajo tha se mbetët i njëjti. Kusari theksoi se nuk ka të bëjë me çështje të lëvizjes në qëndrim, por sipas saj, “është e parimit të ruajtjes së mjeteve të Trustit”.
“Është i njejti qëndrim nuk është çështje lëvizje ajo është çështje e parimit të ruajtjes së Trustit kështu që është i njëjtiti qëndrim, ai që ka qenë edhe më herët”, tha ajo për lajmi.net.
Deputetët e pozitës konsiderojnë se nuk është e nevojshme tërheqja e parave nga Trusti, për shkak se sipas tyre, nuk duhet të preken kursimet pensionale të qytetarëve. Kurse opozita është pro këtij vendimi për shkak se sipas tyre, ndihmon në tejkalimin e krizës së Kosovë.
