Presidentja e Hungarisë Katalina Novak, tha se Kosova dhe Hungaria janë ndikuar nga lufta e Ukrainës me Rusinë, raporton InLajmi.
Novak ka thënë se gjatë takimit me Osmanin diskutuan për sfidat si gra politikane e si nëna, por edhe për sfidat që e preokupojnë rajonin.
“Është takim mes presidentësh dhe në pozitat tona si gra. Jemi këtu edhe si nëna, është e mundur të balancosh pushtetin me të qenit nënë. Sa i përket sfidave politike diskutuam dhe nuk dua të shmang problemin e luftës në Ukrainë. Lufta në Ukrainë ka pasur ndikim në Kosovë dhe Hungari”. tha ajo.
E para e shtetit hungarez tha se do të bëjnë çdo gjë për të siguruar energji për Kosovën si kur edhe do të angazhohemi fuqishëm që ta mbështesim Kosovën edhe në proceset e anëtarësimit në strukturat euroatlantike.
“Do të bëjmë çdo gjë për të siguruar energjinë. Për sigurinë në kontinent na duhet edhe paqja. Mbështesim proceset euroatlantike. Ne duam të shfrytëzojmë këtë mundësi që ta përshpejtojmë liberalizimin e vizave dhe duam të hiqen sa më shpejt të jetë e mundur”, tha Katalina Novak.
Sa i përket dialogut Kosovë-Serbi, presidentja Novak tha se palët negociuese duhet të gjejnë terrenin e përbashkët në ruajtjen e paqes në rajon.
“Sa i përket dialogut Prishtinë-Beograd, ai duhet të vazhdohet dhe palët negocuese duhet të gjejnë terrenin e përbashkët dhe ta ruajnë paqen e këtij rajoni. Roli i tyre është të gjejnë kompromis. Integrimi i Ballkanit duhet të jetë zgjidhja afatgjate”, tha presidentja. /InLajmi/
