Presidentja e vendit Vjosa Osmani, në 23 vjetorin e themelimit të Policisë së Kosovës, shprehet krenare me arritjet në fushën e sigurisë, ndërsa theksoi ajo se Policia e Kosovës është hallkë e rëndësishme dhe histori suksesi e vendit, raporton InLajmi.
Derisa ka rreshtuar sukseset e Policisë së Kosovës, presidentja ka vënë në theks çështjen e anëtarësimit të policisë sonë në organizatat ndërkombëtare të sigurisë në këtë rast anëtarësimi në Interpol tha ajo është me rëndësi jetike për vendin.
E para e shtetit, ka përgëzuar Policinë për sukseset ndërsa kujton se kjo forcë e sigurisë është bazamenti i forcimit të shtetësisë.
“Po e shënojmë 23-vjetorin e themelimit të Policisë së Kosovës, njërën nga shtyllat më të rëndësishme të shtetit tonë, një shtyllë që ka luajtur rol të jashtëzakonshëm në konsolidimin e shtetësisë së Republikës së Kosovës. U jam thellësisht mirënjohëse për përkushtimin tuaj të treguar gjatë viteve të kaluara”, tha Osmani, duke shtuar se policia është historia e suksesit të shtetit të Kosovës.
“Policia e shtetit tonë me të gjitha segmentet e saj, përbëjnë jo vetëm njërën nga hallkat më të rëndësishme të shtetit, por edhe njërën nga historitë më të suksesshme se si mund të themelojmë e të ngrisim institucione të qëndrueshme, besueshmëria e së cilave ka qenë vazhdimisht e lartë në mesin e qytetarëve tanë”, tha presidentja Osmani.
Osmani, në këtë ditë, nuk harroi të kujtoj të gjithë policët e rënë në krye të detyrës.
“Kujtojmë policët që kanë rënë në detyrë si Enver Zymberi. Policia është kujdesur që kufijtë të mbrohen e mbikëqyren. Ne bëhemi faktor për ruajtjen e sigurisë ndërkombëtarë. Anëtarësimi në Interpol është shumë i rëndësishëm”. /InLajmi/
