Istogu ka kurorëzuar një edicion të jashtëzakonshëm me titull të kampionit të Kosovës në hendboll. Titullin e 2-të në histori, skuadra istogase e siguroi të mërkurën pasdite në palestrën “Bill Clinton” në Ferizaj.
Istogu fitoi ndaj skuadrës Ferizaj me rezultatin 26:25. Ishte kjo fitorja e 2-të e hendbollisteve të Istogut në serinë finale të plejofit. Ndeshjen e parë të luajtur të shtunën në Istog, skuadra e Faruk Shalës e kishte fituar me rezultatin 32:31.
Ky edicion i Superligës së Kosovës ishte shumë i suksesshëm për istogaset. Ato i kanë fituar të gjitha 22 ndeshjet e stinorit të rregullt.
Gjysmëfinalen e plejofit e kaluan me 2 fitore ndaj Vushtrrisë. Ndërsa edhe në finale me Ferizajn i shënuan 2 fitore. Pra Istogu e mbylli edicionin me 26 fitore nga 26 ndeshje të luajtura.
Titullin e parë të kampionit Istogu e kishte fituar në vitin 2019. Me titullin e ri, Istogu vetëm është konfirmuar si qendër e re shumë e rëndësishme e hendbollit kosovar.
Klubi është formuar vetëm në vitin 2004, ndërsa falë organizimit të mirëfilltë tashmë është prej klubeve kryesore. Më meritori vlerësohet trajneri Faruk Shala me bashkëpunëtorë, ndërsa edhe përkrahja e organeve komunale dhe bizneseve lokale nuk ka munguar.
Sa i takon ndeshjes në Ferizaj, Istogu ka shfaqur më tepër se vendaset. Pas pjesës së parë rezultati ishte 16:13 në të mirë të Istogut. Edhe në pjesën e 2-të mysafiret kanë kontrolluar lojën, ndërsa vetëm në fund Ferizaj u afrua në një gol, 26:25.
Trofeun e kampionit, presidenti i FHK-së, Eugen Saraçini, ia dorëzoi kapitenes së Istogut, Yllka Shatri, shkruan RTV 21.
Istogu e Ferizaj janë në garë edhe për Kupën e Kosovës. Turneu final i Kupës së Kosovës zhvillohet pas 10 ditësh pikërisht në Ferizaj.
